Gobelab Getxoko Hacklabek Linux sistema eragilea ezagutzeko eta instalatzeko doako tailerra eskainiko du igande honetan, azaroak 12, arratsaldeko 6etan Itzubaltzeta gaztetxean. Tailerra guztiz praktikoa egin ahal izateko, interesatuei euren ordenagailuak ekartzeko eskatu diete. Izan ere, Linuxen sorrera eta funtzionamendua azaldu ostean, Gobelab eta Itzubaltzeta gaztetxeko ordenagailu berrietan instalatuko dute Ubuntuko azken bertsioa eta, horrela nahi izanez gero, norberak eramandako ordenagailuan. Aitor Martin “Matxin” Gobelabeko kideak azaldu duenez, tailerra “oso oinarrizkoa” izango da eta jendeak nahi izanez gero geroago ikastaroak egingo dituzte horretan sakontzeko, eta “software eta teknologia askea” hedatzeko prestatu dute. Linux “sistema egonkorra” da, “ondo ibiltzen dena”, gaineratu du Martinek.
Hacker mugimenduak betidanik kritikatu du Windows edo MacOs bezalako sistema eragile itxiak, sekretu eta patente pean daudenak, ezagupena eta berrikuntza moteltzeagatik eta erabiltzaileen datuen segurtasunerako arriskutsuak izateagatik. Era berean, nazioarteko enpresa horiek egiten duten dirutzen aurrean doako software askea lehenestea eskatu diote behin eta berriro gobernuei. Azkenik, euskarazko softwarea bermatzen duen bakarra software librea dela hainbat alditan gogoratu dute, kasurik adierazgarriena Apple konpainiak bere sistema eragilearen euskarazko bertsioa debekatu zuenekoa izan dela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun