Kontsumo solidarioa, arduratsua eta jasangarria bultzatzearen garrantzia azpimarratzea du helburu asteburuko azokak. Izaskun Trabudua Osasun eta Kontsumo zinegotziak nazioarteko ohiko merkataritzaren "alternatibatzat" jotzen du bidezko merkataritza. "Garapen bidean dauden herrialdeetako ekoizleei bidezko soldatak eta lan baldintzak bermatzea du oinarri, duintasunez bizi ahal izateko. Bidezko merkataritzako ekintzak lankidetza tresnak dira garapen bidean dauden herrialdeetako pobreziari aurre egiteko, eta esplotazio eta mendetasun egoera gainditzen laguntzeko pobretutako herriei. Bidezko merkataritzako erakundeek merkataritza sistema alternatiboa eratu dute eta ekoizleei aukera eskaintzen diete iparraldeko merkatuetara bitartekaririk gabe iristeko, eta lan baldintza justuak eta berdintasunezko harremanak ziurtatzeko", azaldu du udal ordezkariak.
Egitaraua:
Azaroak 11, larunbata
12:00 Inaugurazioa.
12:00-15:00 eta 17:00-20:00 Jateko, imitaziozko bitxi, jantzi eta eskulanez osatutako erakusketa.
12:30-13:30 eta 18:00-20:00 Hegoaldeko dantzak eta musika.
Azaroak 12, igandea
11:00 Haurrentzako jokoak.
11:00-15:00 Jateko, imitaziozko bitxi, jantzi eta eskulanez osatutako erakusketa.
12:00-13:00 eta 14:00-15:00 Hegoaldeko dantzak eta musika.
Bidezko merkataritza zertan datzan eta gaia sustatzen duten elkarteen oinarriei buruzko informazioa herritarren artean eta, bereziki, kontsumitzaile gazteenei zabaltzeko asmoz, horren gaineko azoka antolatu du lehendabiziko aldiz Erandioko Udalak. Azaroaren 11n eta 12an izango da ekimena: 12:00etatik 15:00etara eta 17:00etatik 20:00etara, larunbatean; eta 11:00etatik 15:00etara, igandean. Altzaga auzoko udal merkatura hurbiltzen direnek jateko, imitaziozko bitxi, jantzi eta eskulanez osatutako erakusketa izango dute ikusgai; baita hainbat produktu dastatu zein erosteko aukera ere. Hori guztia alaitzeko, Hegoaldeko herrialdeetako dantzak eta musika eskainiko dituzte hainbat taldek. Mercadeco, Setem, Kidenda (Caritas), Lagun Artea, Emaus, Intermon Oxfam, Chile Lindo eta Pagkakaisa (Filipinar Irlak) erakundeen laguntzaren bitartez, 2.000 lagun inguru batzea espero dute antolatzaileek. Argazkian, bidezko merkataritza hainbat produktu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun