Ekitaldi honen asmo nagusia eskusoinu diatonikoaren musika zabaltzea da, eta, era berean, hainbat herrialdetan eta kulturatan instrumentu honekin egiten diren erritmo anitzak zabaltzea da. Hori dela eta, aurtengo edizioan, Portugal, Errumania, Alemania eta Euskal Herriko artistek hartuko dute parte jaialdian. Lehenik, Chäozinha ahizpak jardungo dira Getxo Antzokian; talde portugaldar honek Minho-Garaiko eskualdean dagoen Gondaremeko herri-musika eskainiko du.
Bigarrenik, Julian eta Ion Cobzaru lehengusuek osatutako bikotea arituko da. Errumaniako soinujole hauek haurrak zirela hasi zuten bere jarduera, era autodidaktikoan. Taldeak hainbat estiloko erritmoak jotzen ditu, beti ere ondo baino hobeto ezagutzen duten bere herriko tradiziozko doinuak atzera utzi gabe.
Euskal Herriko doinuak
Errumaniarren ostean, Cathrin Alischek eta Alaitz Telletxeak osatzen duten Alemaniako eta Euskal Herriko bikotea jardungo da. Alischek, musikariaz gain, musikagilea eta musikologoa da, eta zenbait ikaslan egin ditu herri-musikaren inguruan. Alaitz Telletxeak Maider Zabalegirekin hasi zuen bere jarduera, Alaitz eta Maider bikotean, herri-doinuak interpretatzeko, nahiz eta, denbora pasatu ahala, bestelako musika-eraginak gehitu dizkioten bere lanari.
Azkenik, Eneritz Gorritxategik eta Edurtzeta Aniak osatutako bikoteak arituko da Algortan antzinako koplak jotzeko. Genero hau herri-literaturari dagokion arren, ondoren musikaren mundura zabaldu da. Alaitasuna eta erritmoa dira bikote honen abestien ardatz nagusiak. Hain zuzen ere, gaur egun, Ene Bada taldean jorratzen dituzten triki-pop doinuak alde batera utzi eta aspaldi plazetan abesten zituzten kantei helduko diete, berriro, bizkaitarrek.
Lau herrialdetako artistek parte hartuko dute ostiralean Getxoko V. Nazioarteko Trikitixa Jaialdian
Getxoko V. Nazioarteko Trikitixa Jaialdia ospatuko da ostiral honetan, azaroak 10, Algortako Getxo Antzokian, Bizkaiko eta Euskal Herriko Trikitixa Elkarteen eta Getxoko Udal Euskara Zerbitzuaren eskutik. Festa 20:00etan hasiko da eta, oraingoan, lau herrialdetako taldeek hartuko dute parte. Ohi bezala, urtero gai bat hartzen du ardatz nagusi ekitaldi honek, eta aurtengoa koplaren generoa izango da gai hori. Sarrerak, dagoeneko salgai, Algortako kultur etxean, BBKren orotarako kutxazainetan, eta 944 310 310 eta 944 914 080 telefono zenbakien eta www.bbk.es webgunearen bitartez (5 euro) eros daitezke, antolatzaileek jakinarazi dutenez. Edo egunean bertan (6 euro), bestela. Argazkian, Alaitz Telletxea soinujolea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun