“Komunikazio euskarri hau herritarrei egiten zaien gonbidapen zuzena da, udalerriko GKEen bitartez elkartasun gaietan inplikatu eta lan egiteko, Getxotik bertatik mundu hobeagoa baten alde lan egin ahal dugulako”, adierazi du gaurko prentsaurrekoan Imanol Landa Garapen Lankidetza zinegotzi eta hurrengo udal hauteskundeetarako alkategaiak. Duela bi urte Getxoko Udalak eta GKEek osatutako lan-taldean sortu zen DVDa egiteko asmoa. Hain zuzen ere, tokiko erakundearen eta garapen lankdetzan ari diren taldeen elkarlanetik sortutako jardunaren "garrantzia" nabarmendu du Pilar Oronozek, aipatu hamaika GKEen izenean. “Benetan lortu egin dugu helburua, egiten dogun lana guk geuk kontatu ahal izango dugulako, eta gure jardunak jomuga dituen herrialdeetako bizilagunen ahotsa ere entzun ahal izango dugulako. Garrantzitsua da oso, lan handi hau egiterakoan ipintzen dugun gogo eta berotasuna aditzera eman ahal ditugulako”, azpimarratu du.
Mundu osoan
Ondoko hauek dira aipatu GKEak eta jarduten diren herrialdeak:
- Getxo Sahararen alde-Atfal (Aljeriako saharar errefuxiatuak)
- Ayuda Mas (Peru, Ekuador, India, Mozambique eta Txina)
- Biladi (Palestina)
- Ecca Romo (Kongoko Errepublika Demokratikoan)
- Lagun Artean (Guatemalan)
- Mary Ward (Peru eta Ekuador)
- Medicus Mundi (Guatemala, Honduras, Ruanda, Kongoko Errepublika Demokratikoa, Tanzania eta Txad)
- Mugarik Gabe (Bolivia, Guatemala, Kolonbia, Nikaragua, El Salbador eta Kuba)
- Perualde (Peru eta Filipinar Uharteak)
- San Martin de Tours (Kongoko Errepublika Demokratikoa)
- Zabalketa (Bolivia, Peru, Mexiko, Kolonbia, Guatemala, Filipinar Uharteak, Libano, Nijer, Boli Kosta eta Kenia)
Getxo Udalaren laguntzaz hamaika gobernuz kanpoko erakundek hainbat eta hainbat herrialdeetan dituzten egitasmoen berri eman eta herritarrak aipatu taldeekin harremanetan jarri eta eurekin lan egitera bultzatzea dira, hurrenez hurren, tokiko Garapen Lankidetza Arloak kaleratu duen DVDaren helburuak. Argitalpen berria laster izango diren Getxotik Mundura, Mundutik Getxora jardunaldietan aurkeztuko dute, Itzubaltzeta / Erromoko Santa Eugenia plazan. Horretaz gain, 200 ale inguru banatuko dituzte ikastetxe, liburutegi eta GKE, elkarte eta herritarren artean. Argazkian, saharar umeak Aljeriako errefuxiatu kanpamenduetan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun