Askatasunak deituta, Uribe Kostako herri ugarietatik etorritako 90 lagun inguru batu da gaur arratsaldean Astrabuduan, "euskal gazteriaren aurkako erasoak" salatzeko. Izan ere, gaur bertan aztertu ditu Espainiako Auzitegi Gorenak, Madrilen, Jarrai-Haika-Segi auziko epaien aurkako helegiteak. Eskualde mailako mobilizazioa Astrabuduan deitzea ere ez da kasualitatea: bertoko alaba den Aiboa Casares gaztea da sumario horretan auziperatutako Uribe Kostako lagun bakarra.
Iluntzeko 8ak aldera, Josu Murueta plazan "Gazteriaren aurkako erasorik ez! Utzi pakean Euskal Herria!" zioen pankarta zabaldu, eta Astrabuduako kaleetan barrena abiatu da manifestazioa. Hain zuzen ere, Espainiako Auzitegi Nazionalak legez kanpo utzitako Jarrai, Haika eta Segi gazte erakundeen aldeko oihuak izan dira nagusi ibilbide osoan zehar: "Segi borrokan, segi antolakuntzan", "Euskal gazteria aurrera" eta "Ez gaituzte isilduko" bota dituzte, besteak beste, protestaldian batutako dozenaka lagunek. Hala ere, PSE-EEren egoitza albotik igaro direnean, nabarmenak izan dira sozialisten eta Jose Luis Rodriguez Zapatero Espainiako presidentearen eta Terrorismoaren Kontrako Legearen aurkako aldarriak: "Zuek faxistak zarete terroristak", "Si ésta es vuestra paz, no la queremos" (Hau al bada zuen bakea, ez dugu nahi)... Manifestazioa arazorik gabe bukatu da abiatu eta ordu erdi beranduago.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun