Presoen aldeko hamaika ekimen izango da bihar Uribe Kostan
2006ko aza. 23a, 13:37
Hilero bezala, azken ostiralerako, azaroak 24, hainbat kontzentrazio deitu du Etxeratek Euskal Herri osoan. Hilabete honetako leloa "Estatus politikoa orain. Euskal presoak Euskal Herrira!". Uribe Kostan honakoak izango dira hitzorduak: 11:15ean Itzubaltzeta / Erromon Artatza-Romo institutuaren aurrean; 19:30ean, Armintzan, bus geltokiaren aurrean eta Astrabuduan, Josu Murueta plazan; 20:00etan; Erandion, metro aurrean; Leioan, Boulevardean; Areetan, Xake plazan; Algortan, Telletxen; Berangon, Gudari enparantzan; Sopelan, udaletxe aurrean eta Urdulizen, BBVAren aurrean. Itzubaltzeta gaztetxeak Etxerateko ekimenarekin bat egin eta ordu erdiz itxiko ditu ateak. Leioako Kurkudi eta Algortako Amnistia tabernetan, berriz, taloak egongo dira kontzentrazioen ostean. Argazkian, Itzubaltzeta / Erromon pasa den irailaren 22an hainbat solidariok egindako ekintza.Uribe Kostako Amnistiaren Aldeko Mugimenduak adierazitakoaren arabera, "ez dago aitzakiarik, ezin da hutsik egin. Egoera politiko honetan ezinbestekoa da azken ostiraleko mobilizazioan parte hartzea. Presoen eskubideak eta izaera politikoa onartu gabe ez da gatazka gainditzeko prozesurik izango. Gure esku dago!".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun