Bilbon jaio eta Berangon bizi den Esther Zorrozua erdarazko idazleak "Bilbao, ciudad abierta" liburua kaleratu du. Bere bigarren liburua den lan horretan, Zorrozuak elkarri lotuta dauden Bilbori buruzko hamabi istorio batu ditu. Idazle berangoztarrak Bizkaiko hiriburuko ohitura zaharrak, gaur eguneroko bizitza eta bilbotarren asmoak eta frustrazioak ekarri ditu orrialdeetara, beraren ustez guztiontzat irekia den hiriari omenaldi goxoa eginez. Liburua salmentan jarriko dute bi aste barru, abenduaren 6tik aurrera, Durangoko Disko eta Liburu Azoka ofizialean Hiru argitaletxeak jarriko duen saltokian. Ondoren, abenduaren 12an, egin beharreko aurkezpena taxuz egingo dute Bilboko Casa del Libro liburudendan egileak berak, Eva Forest Hiru argitaletxeko editoreak eta Seve Calleja eta Carlos Martinez idazleek. Argazkian, Eva Forest eta Esther Zorrozua, eskerretik eskumara, 2004an “La casa de La Galea” liburuaren aurkezpenean.
Esther Zorrozua 1955ean jaio zen Bilbon. 22 urterekin filologia erromanikoan lizentziatu zen eta 1991n Filosofia eta Letretan doktoratu zen Mario Vargas Llosari buruzko tesi batekin. 1977tik gaztelerazko literatura eta hizkuntza irakasten ditu batxilergoan. 2001ean “La savia del tamarindo” liburu kolektiboan hartu zuen parte Getxoko hainbat idazlerekin batera. Hurrengo urtean “60 relatos, 60 autores” antologian ere bere harri-koskorra ekarri zuen. 2004an “La casa de La Galea” bere lehen liburua idatzi zuen, Neguriko burgesia handiak XX. mendearen lehen erdialdean izan zuen deskonposizio prozesua islatuz. Gainera, hainbat literatura aldizkaritan kolaboratzen du. Besteak beste, “Escribir y Publicar”, “Alborada”, “Decires”, “Almiar”, “Atramentum”, “Yo Escribo” eta “Tus Relatos”. Horretaz gain, sarean hainbat ipuin eta nobela zati jarri ditu eskura www.albumestheryagustin.com bere webgunean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun