"Gutxi barru" milioi bat euroko dirulaguntza emango du antzoki berriaren proiekturako Espainiako Sustapen Ministerioak, Zarraoak adierazitakoaren arabera. Ostegun honetan, azaroak 30, hitzarmen bat sinatuko da Madrilen dirulaguntza horren baldintzak ezartzeko. Bestalde, 2007ko Espainiako Aurrekontuek milioi bat t´erdi eurotako beste dirulaguntza bat aurreikusten dute. Alkate getxoztarraren hitzetan, "gutxi barru, Tokiko Gobernu Batzarrak, antzoki berriaren proiektuaren idazketa lehiaketara aterako du eta hori datorren otsailerako egon liteke prest".
Antzoki berriaren ezaugarriak
Hasierako proiektuaren arabera, antzoki berrian, 800 lagunentzako areto handia egongo da, bere ekipamendurekin; eta 200 pertsonentzako beste areto txikiago bat, formatu txikiko ikuskizunetarako. Atzeko partean, Udalak duela gutxi erositako orubean, bi edo hiru solairuko eraikin bat egingo dute eta, hor, beste areto bat eta Andres Isasi Udal Musika Eskolako egoitza bat egon litezke.
Datorren udan, Algortako Getxo Antzokiaren egungo eraikina (argazkian) lurrera botzea espero dute tokiko agintariek: "udalerrian antzoki berria eraikitzeko lehenengo urratsa", adierazi dutenez. Izan ere, antzoki berria 2010aren hasierarako prest egotea aurreikusten du Getxoko Udalak. Iñaki Zarraoa alkateak iragarritakoaren arabera, Kultur Etxea dagoeneko bere egitaraua moldatzen hasi da, 2007ko udaberritik aurrera, ezer ere ez antolatzeko bertan. Antzoki berriak kostatuko duen 26 milioi eurotatik %10a ipiniko du Espainiako Sustapen Ministerioak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun