Hilabetearen azken asteazkenarekin batera, gaur, azaroak 29, euskal preso politikoen eskubideen aldeko mobilizazioak burutu dira hainbat unibertsitate eskolatan, Presoen Aldeko Taldeek deituta. Leioa eta Erandioko EHUko campusari dagokionez, 90 lagun elkartu dira, "Iñaki de Juana gose greba mugagabean. Baldintza demokratikoak orain! Estatus politikoa orain!" irakur zitekeen pankartaren atzean, PATek emandako datuen arabera. "Egoerak horrela eskatuta, Iñaki de Juanaren egoeraren salaketan oinarritu dira aipatu kontzentrazioak eta, horretarako, Iñakiren askatasuna eta preso politikoen estatus politikoaren onarpena aldarrikatu dira. Horrez gain, gatazkaren konponbiderako prozesua benetan demokratikoa izan dadin, baldintza demokratiko minimo batzuk ezinbestean bete behar direla azaleratu da, baita bide honetatik, espetxe-frontean espainiar eta frantziar estatuek darabilten politika errepresiboa etetea ezinbestekoa dela ere", azaldu dute errepresioaren aurkako erakundeko kideek. Argazkian, gaurko kontzentrazioko irudia / PAT.
Azkenik, abenduaren 11tik 14ra bitartean, azken asteotan Euskal Herrian barrena dabilen presoen eskubideen aldeko ekimen ibiltaria unibertsitatera helduko dela jakinarazi die mobilizazioetan parte hartu dutenei eta ikaslegoari orokorrean PATek. Horrela, Leioako campusean ere izango da gose-greba, "presoen eskubideen aldeko konpromezuak lortzeko asmoz". Egun horietan izango den egitarauaren berri izateko eta egindakoen kronikak, argazkiak zein bideoak jasotzeko, webgune bat jarriko dute martxan datozen egunetan, ondoko helbidean: http://www.pat-eh.org/ekimenibiltaria
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun