Euskal Herriko Bertsozale Elkarteak eta Lanku bertso-zerbitzuak elkarlanean bertsolaritzaren mahai jokoa sortu dute. Bertsolaritzaren ondarea gorde eta izaera ludiko eta didaktiko baten bitartez zabaltzea du helburu jokoak. 12 urtetik aurrerako edozein bertsozalek bere ezagutza neurtu ahal izango du Mainontzik eskaintzen dizkion 1800 galderetan. Zailtasunaren arabera, galderak hiru multzotan banatzen dira: zailtasun txikikoak, zailtasun ertainekoak eta zailtasun handikoak (600 galdera multzo bakoitzean).
Jokalari bakoitzari mainontzi edo euskarri bat emango zaio. Mainontzia kolore ezberdineko sei peoiekin betetzen duen lehen jokalariak irabaziko du partida. Horretarako sei arlotan banatutako galderei ondo erantzun beharko die:
- Teoria: Bertsolaritzaren alderdi formala.
- Jardun: Gai ote zara kopla bat osatzeko Mañukortaren gisan?
- Hizkuntza: Bertsogintzaren ezinbesteko tresna.
- Gaur: Zer berri egungo bertsolaritzan?
- Historia: Izan zirelako gara eta garelako nor izan daitezela.
- Saski naski: Han-hemen bildutako bitxikeriak.
Bertsolaritza ezagutzeko baliabide egokia ez ezik, Mainontzi euskara lantzeko tresna ezin hobea ere bada, ahozko mintzaira hobetzeko aukera ematen duelarik. Bestalde, euskal ondare tradizionala modu dibertigarrian ikasteko bidea da.
Ibilbide luzeko jolasa
Mainontzi mahai jokoa ez da atzo sortutako kontua. 10 urte dira bertso-tribiala izenez sortu zela Gasteizko bertso-eskolan, bertsozaletasuna bultzatzeko baliabide erara. Ordutik hainbat bertso-eskola eta herritan jolastu dira bere galdera-erantzunekin. Azkenik, esperientzia luzeak emandako aholkuak eta eskarmentuaren emaitza da Euskal Herri osora zabalduko den Mainontzi bertsolaritzaren mahai jokoa.
Lan-taldea
Mainontzik sortzaile ugari bildu du bere inguruan: Galderak Karlos Aizpuruak eta Fredi Payak egin dituzte, eta zuzenketa lanetan Arkaitz Goikoetxeak eta Oihane Pereak jardun dute. Koordinazio-lana Euskal Herriko Bertsozale Elkarteak eta Lankuk egin dute, eta horretaz gain, Lanku arduratu da jokoaren gainerako ekoizpenaz.
Nola eskuratu Mainontzi mahai jokoa?
www.lanku.com eta www.bertsozale.com web guneetan aurki dezakezu. Durangoko azokan, Bertsozale elkartearen stanean ere salgai izango da.
Gabonetan ez dakizula zer oparitu? Ez kexkatu, bertsolaritzari buruzko mahai jokoa jarri dute euskaldun eta euskaltzaleon eskura Euskal Herriko Bertsozale Elkarteak eta Lanku bertso-zerbitzuak. Unai Elizasu aipatu enpresako marketin ardunarekin batera, Donostian, aurkeztu zuen joan den asteartean (azaroak 28), Mainontzi, Xabi Payak. Algortako bertsolaria da jokoaren egilea. Halere, Fredi anaia eta Karlos Aizpurua arduratu dira jokoaren galdetegia osatzeaz. Eta payatarrei buruz ari garela, igande honetan, Durangoko Ezkurdi kiroldegian (17:30) izango den saioan (Algortan izan zen bigarren finalaurrekoa) erabakiko da Fredi eta Xabi Bizkaiko Bertsolari Txapelketako finalean egongo diren. Baina asteburura joan gabe, gaur bertan, "Bertso tranpak" ikuskizuna eskainiko du Xabik, Andoni Egaña, Ander Lipus, eta Aitor Agirianorekin batera, Erandioko Altzaga udal merkatuan, 19:30etik aurrera. Argazkian, Mainontzi bertsolaritzari buruzko mahai jokoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun