Kirol Portuan dagoen Abra Aquarium zentroaren kudeaketa Udalaren eskuetan dago jada eta izena ere aldatu egin diote: hemendik aurrera Getxo Aquarium izango da. Inbertsio batzuk egitea ere aztertzen ari dira. Horrela, bisitetarako, "museo askotan daudenen pareko" hizkuntza anitzetako soinu-gidak jartzea aztertzen ari dira udal arduradunak. “Akuarioa txikia izan arren, bertan dagoena balio handikoa da. Gida edo sistema automatizatu batek arrainontzi bakoitzean dagoenaren balioa azalduko balu, gure inguruko itsasoko bizitzaren ingurukoak ikasi ahal izango genituzke; baita horren gainean kontzientziatu ere”, Zarraoa ustez.
Hobekuntzak
Aurreikusitako beste hobekuntzen artean, arrainontzi gehiago jartzea, sarrera egokitzea eta horren eskaintza Turismo Bulegoak berak kudeatzea egongo lirateke. Bestalde, ikastetxeetako ume eta gazteak hartzen dituen Bizkaia Maitea ekimenean parte hartzeaz gain, EHUrekin hitzarmenak lortzea ere aurreikusita dago, unibertsitarioek ere erabil dezaten. Eta bisiten kopurua handitzekotan, instalakuntzak handitzea ez dute baztertzen.
Getxoko Udalak milioi bat eurotan erosi ditu Sistemas Acuariologicos Marinos elkartearen ondasunak (arraiontziak, arrainak, laborategia eta egoitzaren azalaren gaineko eskubidea), Getxo Kaiaren kontzesioak irauten duen bitartean, 2023ra arte gutxi gora behera. Diru kopuru horretatik 600.000 euro Bizkaiko Foru Aldundiak jarriko ditu, Iñaki Zarraoa alkateak jakinarazitakoaren arabera. “Kultur eta hezkuntza ondasuna da, ziurrenik diru galerak izango dituena. Hala ere, foru erakundearen laguntzari esker, dena egongo da kontrolpean”. dio udal agintariak. Akuarioaren ustiaketarako lehiaketa publikoa prestatzen duten bitartean, elkarte berbera arduratuko da kudeaketaz, sei hilabetetan gehienez. Udalak hilabetero 24.000 euroko dirulaguntza emango dio, akuarioa zabalik mantendu ahal izateko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun