Ikasle Abertzaleek emandako datuen arabera, dozenaka ikasle elkartu da gaur, abenduak 6, Leioako Barandiaran ikastetxean (30 lagun), Sopelako Ander Deuna (9 lagun) eta Algortako San Nikolas (23 lagun) ikastoletan, Getxoko Aixerrota institutuan (13 lagun) eta Itzubaltzeta / Erromoko Romo ikastetxean (25 lagun), herri eskoletan parte hartzeko. Azken hauek Artatza-Romo institutuan egitekoak ziren, baina tokiz aldatu behar izan dituzte Zuzendaritzak baimenik eman ez duelako. Hezkuntza zentroetako ateak zabalduz, euskal ikasleak "Espainiar Konstituzioaren eguna ospatzera behartu" nahi zituztela salatu du IAk. Argazkian, hainbat ezezagunek Algortako Telletxe kalean erretako Franco garaiko Espainiako Etxebizitza Ministerioko plaka faxistak.
Uribe Kostako Ikasle Abertzaleak taldearen ekimenez, gaur, abenduak 6, Espainiako Konstituzio eguna, hainbat ikastetxek ireki dituzte ateak, “jai egun arrotzen aurrean intsumituz”. Hain zuzen ere, “Nazio bat garelako, ikasleok jai egun arrotzei intsumisioa!” leloari heldu diote neska-mutilek, gaur ere eskolara joateko. Ikasle erakundeak adierazi duenez, "gaurkoan euskal ikasleak Espainiar Konstituzioaren eguna ospatzera behartu nahi gintuzten. Konstituzio honek Euskal Herriaren ukazioa eta gure lurraldearen zatiketa dakartza. Honen aurrean, IAk argi dauka, abenduaren 6an zein gainontzeko jai egun arrotzetan ikastetxeak ofizialki ireki arte, herri eskolak antolatuko ditugula autogestioa bultzatuz eta Euskal Eskola Nazionala irudikatuz; horrela, hezkuntza eredu honek eskaintzen ez dizkigun edukiak bestelako pedagogia baten bidez landuz". Gaurko herri eskolen balorazio positiboa egin du IAk.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun