Txanogorritxo, hiru txerritxoak, jentilak, lamiak eta enparauak gurasoei zein seme-alabei ipuinak sortu eta kontatzen irakasteko bilduko dira etzi eta etzidamu, asteazken eta osteguna, Areetako udal liburutegian. Antton Irusta ipuin kontalariaren esanetara, euskal mitologiako, ipuin tradizionaletako zein norberak sortutako unibertsoko pertsonajeek “guraso eta seme-alabak elkarrekin ipuin kontaketaz gozatzeari eta euskaraz kontatzera motibatzeari” ekingo diete. Tailerrak euskaraz gauzatuko dira 17:30etatik 19:00etara eta lehenengo egunean gurasoek baino ez dute parte hartuko, bitartean haurtzaindegi zerbitzua egongo dela. Bigarren egunean, berriz, seme-alabek ere parte hartuko dute. Tailerra Sendi egitasmoak abiatu du. Ekimen hori Egizu Getxo Euskaldun! euskara elkartearen eta Getxoko Udal Euskara Zerbitzuaren eskutik jaio da, Getxoko umeen gurasoek euskara erabiltzea eta belaunaldien arteko hizkuntza transmisioan eragitea helburu. Ikastaroan izena emateko gaur da azken eguna, horretarako, 685 732 963 telefonora deitu edota sendigetxo@yahoo.com e-postara idatz daiteke. Irudian, Artez euskara zerbitzuak Txanogorritxori buruz kaleratutako postala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun