Talde argazkia
Bestetik, egunerokoan erabiltzearen garrantzia azpimarratu nahirik, 16an bertan eguerdiko 13etan, denok EHNA eskuan, talde argazkia egingo dute. "Aurrerantzean EHNAren erabilera bultzatzeko kanpaina egin dezagun, jende jatorreko talde zabala bilduko duen argazkia oso lagungarria izango zaigu", azaldu dute Getxo Biziakoek. Horrexegatik eta, aldi berean, "Naziotasun Aitormenak jadanik egina duen ibilbidea elkarrekin ospatzeko", argazkia ateratzeko deialdiarekin bat egitera gonbidatu dituzte herritarrak.
Naziotasun Eskubidearen Egunarekin bat eginez, larunbatean ere EHNA egiteko aukera egongo da Algortan
Azken urteetan bezala, aurten ere, Giza Eskubideen Nazioarteko Egunaren ondorengo asteburuan Naziotasun Eskubidearen Eguna ospatzeko deia egin du Udalbiltzak. Horrekin bat eginez, larunbat honetan, abenduak 16, goizeko 10etatik eguerdiko 14ak arte ireki egingo du Getxo Biziak, urte osoan zehar astelehenetik ostiralera arratsaldez irekita dagoen Algortako Torrene kaleko EHNA tramitatzeko bulegoa. "Zuk zeuk Euskal Herriko Naziotasun Aitormena (EHNA) egina baduzu, aukera baliatu nahi dugu ondoan dituzun lagun eta senideak 16an EHNA eta Nazio Batuen Erakundearen egoitzara igortzeko den euskal naziotasuna aintzat hartzeko eskaera ofiziala egitera animatzea eskatzen dizugu", adierazi die getxoztarrei ezker abertzaleko herri plataformak. "Eta egina ez baduzu, aukera ezin hobea duzu naziotasun eskubidearen aldarrikapen kolektibo honetara lotzeko", gaineratu du. EHUko Leioa eta Erandioko campusean, atzo egon zen EHNA tramitatzeko aukera. Datorren astelehenean (abenduak 18) ere mahaiak jarriko dituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun