Portu Zaharrerako spa-hotelaren proiektuaren "arriskuaz" ohartarazi dute Getxo Biziak eta Txorimalo gaztetxeak
2006ko abe. 18a, 17:26
Ostiral honetako udalbatzarrean eman daitekeen Algortako Portu Zaharreko birkalifikazioarekin, "espazio publiko eta herritarra dena, pribatu eta arrotza" bihurtu nahi dutela salatu dute Getxo Bizia herri plataformak eta Txorimalo gaztetxeak. "Herriaren ondare eta aberastasuna den lekua, aberats baten zorroa potolotzeko izatea gura dute", bi eragileen iritziz. Horregatik guztiagatik, hilaren 2an, Itsas Ganen burututako hausnarketa kolektiboko gainontzeko partehartzaileei, eta oro har getxoztar guztiei dei egin diete "gai honen aurrean adi" egon daitezen, "batzuentzat hain goxoa den eremu horren erabilera publikoa bermatu eta herritarren borondatea errespetatua izan dadin". Argazkian, Itsas Ganen burututako hausnarketa kolektiboko irudia.Abenduaren 22ko udalbatzarrean behin betikoa egingo dute Algortako Portu Zaharreko orubearen birkalifikazioa, publikoetarako ezean ekipamendu pribatuetarako izendatuz. Horrela jakinarazi zuen Iñaki Urkiza Etxebizitza eta Gizarte Gaietarako zinegotziak, hilaren 2an, Itsas Ganen burututako hausnarketa kolektiboan. Tartean, 1.200 pertsona baino gehiagok aurkeztutako alegazioak atzera botako dituzte. "Erabaki horrek, herritarren eskakizun horiei muzin egiteaz gain, bidea irekiko lioke azken hilabeteetan Udala lantzen ibili den proiektuari: Portu Zaharrean talasoterapia edo spa-hotel bat eraikitzea alegia, hotelen kate multinazional batek kudeatuta", Getxo Biziak eta Txorimalo gaztetxeak salatu dutenez. "Proiektu horrek talka egiten du Portu Zaharreko biztanleek urteetan zehar adierazitako asmoekin", gaineratu dute bi eragileek. Hausnarketa hartan erabateko adostasuna egon zen orube horren erabilera publikoa izan behar zela adierazteko orduan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun