Mozioaren testua:
Getxo Biziak eta Getxoko Etxeratek Jon Aingeru Otxoantezana presoaren senideek jasandako istripuaren aurrean aurkezten duten mozioa:
Joan den abenduaren 9an, Nanterren (Paris) duten Jon Aingeru Otxoantezana “Kirru” Ondarruko preso politikoaren neskalagun Beatriz Fernandezek eta beraien 7 urteko semeak sakabanaketak eragindako istripua jasan zuten, Jon Aingeru Otxoantezana bisitatu ostean beraien bizitoki Algortarako bidean zirela. Jon Aingeru Otxoantezanarekin dagozkien bisitak egiteko, 2.000 kilometro baino gehiagoko joan etorria burutu behar izaten dute, izugarrizko odoluste ekonomikoari aurre egin behar izateaz gain, beraien biziak arrisku larrian jarriz.
Sakabanaketak Jon Aingeru Otxoantezanaren senideei eragindako istripuaren ondorioz, ama-semeak Gurutzetako ospitalera eraman behar izan zituzten. Zorionez, ordea, ez zuten atzeraezinezko kalte fisikorik jasan. Autoa, aldiz, ezertarako balio ez duela geratu da.
Senide eta lagunoi eginarazten dizkiguten milaka kilometroren ondorioz ere, 1997ko martxoaren 14an Angel Figeroa preso politikoaren amona eta Getxoko bizilaguna Antxoni Fernandez hil egin zen Alcala Meco kartzelara (Madril) zihoala jasandako istripuan.
2006ean, 45 senide eta lagunek jasan dituzten 21 istripu larri eragin ditu sakabanaketa politikak, oraingoz.
Beraz, sakabanaketa politikak gure senide preso politikoen eskubideak etengabe urratzeaz gain, senide eta lagunok ere zuzenean kolpatzen gaitu.
Horren guztiaren aurrean, Getxo Biziak eta Getxoko Etxeratek ondoko mozioa aurkezten dute Osoko Udalbatzarrean onartua izan dadin:
- Udaletxe honek Jon Aingeru Otxoantezanaren senideek jasaniko istripua UMP eta PSOE alderdiek indarrean duten sakabanaketa politikak eragindakoa izan dela salatzen du.
- Egun Pariseko eta Madrileko gobernuek Euskal Preso Politikoen Kolektiboaren aurka indarrean duten espetxe politika presoen eta senideen sufrimenduan ardaztua dago eta heriotza eta samina sortzen du. Giza sufrimendua sortzeaz gain, gatazka politikoa elikatu egiten du.
- Horregatik guztiagatik, eta, Euskal Preso Politikoen Kolektiboaren eta beraien senideen eskubide guztiak bermatzeko bide bakarra delako, Euskal Preso Politikoen Kolektiboa eskubide guztien jabe izanik urgentziaz Euskal Herrian biltzeko exijitzen die Udal honek Madrileko nahiz Pariseko gobernuei.
- Hala jakinaraziko die udal honek bi gobernuei exijentzia hori eginez zuzenduko dien idatzian.
- Halaber, eta, Euskal Preso Politikoen Kolektiboa Euskal Herriratua izan dadin exijitzeko Etxerat elkarteak Azken Ostiralero iluntzeetan egiten dituen mobilizazio isiletan herritarrei parte hartzeko deia luzatzen die Udal honek.
- Udal honek ere aipatu kontzentrazioetan parte hartzeko eta euskal preso politikoen eta beraien senideen eskubideen defentsan konpromisoak hartzeko prestutasuna erakusten du.
- Erabaki hauen guztien berri emango die udal honek herritarrei nahiz komunikabideei.
Presoen senideek jasandako istripuak Getxoko udalbatzarrera eramango dituzte ostiralean
Jon Aingeru Otxoantesana "Kirru" preso ondarrutarraren senideek jasandako istripuaren aurrean mozioa aurkeztu dute, abenduaren 22ko udalbatzarrera begira, Getxo Bizia herri plataformak eta Getxoko Etxeratek, Uribe Kostako Amnistiaren Aldeko Mugimenduak Etengabe bitakoran jakinarazi duenez. Horretara, ostiralean bertan, mozioari babesa emateko, udaletxera joateko deialdia egin du Etxeratek. Beatriz Fernandez algortarrak eta Jon Otxoantesana bere 7 urteko semeak hilaren 9an izan zuten istripua senarra eta aita, hurrenez hurren, Parisen bisitatzetik etxera zetozela. Istripua A-8 autopistan gertatu zen, Itziar parean: euriaren eraginez autoa irristatu ondoren bide erdian gurutzatu eta atzetik zetorren beste auto batek kolpatu zituen. "Autoa desegite tokirako gelditu da. Beatriz eta Jon ospitaletik pasa ondoren etxean dira orain, hainbat kontusiorekin. Azterketa medikoak ere egin beharko dizkiete. Istripua nolakoa izan den ikusita zorte handia izan dutela esan daiteke", adierazi zuen orduan errepresioaren aurkako erakundeak. Argazkian, presoen senideek jasandako istripuak salatzeko pankarta Algortan / Etengabe.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun