Bihar jasoko du Zilarrezko Q-a Zientzia eta Teknologia Fakultateak

Euskal Herriko Unibertsitateko (EHU) Zientzia eta Teknologia Fakultateak ostegun honetan, abenduak 21, jasoko du gestio bikaintasunaren Zilarrezko Q-a, Erandio eta Leioako campusean, goizeko 11:30etik aurrera izango den ekitaldian. Honekin batera hiri dira aipatu ziurtagiria duten ikastegiak: Gasteizko Ingeniaritza Unibertsitate Eskolak Zientzia eta Teknologia Fakultatearekin batera lortu du hil honetan eta Donostiako Unibertsitate Eskola Politeknikoak 2002ko otsailean erdietsi zuen. Uribe Kosta eskualdeari dagokionez, Getxoko Udalak astelehenean Donostiako Kursaal aretoan izandako ekitaldian jaso zuen Zilarrezko Q-a; Erandioko Ategorri-Tartanga institutuak, berriz, 2005eko abenduan. Argazkian, Zientzia Fakultaterako sarreretako bat.

EHUko Zientzia eta Teknologia Fakultateak, Euskalitek ematen duen Zilarrezko Q-a lortu du "gestioaren hobekuntza eta berrikuntzaren arloan kalitate osoaren kultura eman eta zabalduz egindako lanagatik", unibertsitateko iturriek adierazitakoaren arabera. Aintzatespen hau duten EHUko hiru ikastegietako bat da Zientzia eta Teknologia Fakultatea, eta Bizkaiko campuseko bakarra. Ekitaldia Juan Ramon Gonzalez Velasco Zientzia eta Teknologia Fakultateko dekanoaren eta bere taldearen azken ekitaldi publikoa izango da. Gonzalez Velascoz gain, Juan Ignacio Perez EHUko errektorea, Tontxu Campos Eusko Jaurlaritzako Hezkuntza, Unibertsitate eta Ikerketa sailburua eta Xabier Alkorta Euskalit Fundazioko presidentea ere egongo dira ekitaldian. Horri bukaera emateko, fakultateko Gabonetako kontzertua izango da.
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun