Azaroaren 30ean CSIF-CSI, EILAS, ELA eta LAB sindikatuek eta Euskal Herriko Unibertsitateak (EHU) adostutako hitzarmena berretsi du gaur EHUko Gobernu Kontseiluak. Hortaz, lan eskaintza publikoa egingo dute datorren lehen urteko lehen hiruhilekoan administrazioko eta zerbitzuetako langileentzat. EAEko Unibertsitate Sistemaren Legearen Laugarren Xedapen Iragankorra aplikatzeko oinarriak onartu dituzte EHUk eta sindikatuek, eta hitzarmen horrek ahalbidetuko du lan eskaintza publikoa egitea. EHUk berak onartu du lan eskaintza publikoen hutsuneak handitu egin duela administrazioko eta zerbitzuetako langileen "prekarietatea eta behin-behinekotasuna": gaur egun langileen %70ek dituzte behin-behineko kontratuak. EHUk uste du lan eskaintza publikoarekin %70etik %15era jaitsiko dela. "Aukera ezin hobea dugu administrazioko eta zerbitzuetako langileen egoera normalizatzeko", gaineratu dute. Argazkian, Donostiako Unibertsitate Eskola Politeknikoko idazkaritza.
EHUren esanetan, hitzarmenaren ekarpen nagusia da zehaztu egiten dituela lan eskaintza publikoen ondorioz egin beharreko aukeraketa prozesuak: "Ondorioz, gainditu egingo dira 1995ean bertan behera geratutako lan eskaintzak izan zituen oztopoak".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun