Euskal Kulturaren Jardunaldiak udalerriko herri guztietara zabaltzea eskatu du Getxoko PPk
Getxoko PPk “hemendik aurrera” euskararen alde egingo diren ekitaldiak Getxo udalerriko “zonalde guztietan” burutzea eskatuko du bihar egingo den Getxoko Udal Batzarrean. Popularrek kritikatu dute aurtengo VII Euskal Kulturaren Jardunaldiak bere osotasunean Algortan ospatu izana eta datorren urtetik aurrera udalerri osora zabaltzea proposatu dute. Gaur goizean, Marisa Arrue Getxoko PPko presidentea eta bozeramaileak euskararen aldeko bere ekimena azaldu du: “Udaletik, eta zehatz-mehatz Euskara Zerbitzutik, gure herrian hizkuntz hori sustatzeko ahalegin handia egiten ari da, baina, halere, sustapen horren atal garrantzitsuenetako bat diren hizkuntzaren erabilera indartzeko kaleko ekimenak Getxoko zonalde batzuetan baino ez direla egiten ikusten dugu, udalerri osora zabaldu beharrean”. Arrueren ustez, “jokabide hori okerra da” eta “hizkuntza getxoztar guztion artean sustatu nahi badugu ezin gara auzo batera mugatu, udalerri osora zabaldu baizik” azpimarratu du.
Marisa Arrueren arabera, gainera, kontuan hartu behar da Getxo udalerrian “gero eta jende gehiago euskaraz hitz egin dezan lortzeko” ekimenetan Euskara Zerbitzuak urtero erabiltzen duen diru kopuru handia. Hortaz, lan eta aurrekontu hori eraginkorragoa izan dadin, “ahalegina egitea” eskatu du, ekimen horiek udalerriko herri guztietara zabaltzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun