Sindikatu eta udal gobernuaren arteko "giro gaiztotua" eta "adostasunik eza" aipatuz, PPk eta PSE-EEk gogor egin zieten kontra tokiko langileen egoeraren gainean udalbatzarrean aurkeztutako aldaketei. "Inposaketa" hitza ere entzun zen batzar aretoak, baita Udalaren aurka eta langileen aldeko hainbat sententzia mahaigaineratu ere. Begoña Ezkurra Giza-baliabidetako zinegotziak, ordea, hirukoaren jokabidea defendatu zuen, negoziazioak "nahikoak" izan direla adieraziz. "Negoziazioak sei hilabete iraun dute eta bi lan batzar izan dira. Lehenengora, lau sindikatu etorri ziren; bigarrenera, aldiz, bakarra. Negoziazioak ez daude itxita, baina, egunen baten hartu beharko dugu ereabkiren bat, ezta? Sinatu dezatela eta jarraituko dugu hizketan", bota zuen udal arduradunak.
Dirudienez, laneko aldi baterako ezintasunaren gaineko eztabaidan trabatuta dago negoziazioa. Hain zuzen, Udalaren aurkako hainbat sententzia ekarri dituen gaia, Getxoko PPk nabarmendu zuzenez. Horren harira, sindikatuen eta Eudelen artean lortutako hitzarmena, udaletxeetara heltzerakoan, "tokian-tokiko langileentzako onuragarriak diren baldintzak hartu beharko lirateke kontuan", ELAk dioenez. Hartara, sententziak gora eta behera, laneko aldi baterako ezintasuna da gakoetako bat.
Udal langileen baldintzak erabakitzeko orduan sindikatuak "baztertzea" leporatu diote Zarraoari
Iñaki Zarraoa Getxoko alkatearen jokabidea eta lan harremanak ulertzeko modua kritikatu ditu udaletxeko ELAk, euren hitzetan, udal agintariak "sindikatuen ordezkariak alboratuz eta nagusikeria erakutsiz jokatzen duelako, eskubideak urratuz eta auzitegien erabakiei entzungor eginez". Joan den ostiraleko udalbatzarrean, Getxoko Udalaren langile funtzionarioen baldintzak erregulatzeko testua onetsi zen EAJ, EA eta EB-Berdeen botuei ezker. Horren aurrean, "2006ko matxoaren 9an ELAk, Euskadiko Langileen Batzordeek eta UGTk Eudel erakundearekin lortutako hitzarmena beste behin pikutara bidaltzea" egotzi diote alkate zein udal gobernuari euskal sindikatuak, "bere kabuz, egon badauden legezko foro demokratikoetatik (enpresa batzordeak eta langile-batzarrak) kanpo jokatu nahi izan dutelako, Udalhitz hitzarmena udalbatzarrera eramanez, sindikatuekin adostasun maila batera heltzeko ahal zuten guztia egin gabe". Argazkian, Getxoko udaletxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun