Hain zuzen ere, espetxe barruko egoera "okerrera" egitea izan zen ekimen ibiltariaren sua piztu zuen garra. Urriaren 22an hasita, eskualdez eskualde txandakatzen hasi zenetik, hiru izan dira ardatz nagusiak: batetik, kondena osorik bete duten presoen askatasuna aldarrikatzea. Egoera honetan daude ehun bat lagun, Virumbralesek azaldutakoaren arabera, "zirrikitu ezberdinak erabiliz (delitu berriak egotziz, kondenak luzatuz...) preso mantentzen dituztenak". Bestalde, egun sei lagun larriki gaixo daude Espainia eta Frantziako kartzeletan. Horiek kalean egon behar direla ere aldarrikatu nahi dute. Azkenik, preso guztiak Euskal Herriko espetxeetara ekartzea eskatzen dute, "eskubide guztien jabe direla". Hori guztia dela eta, "larritzat" jo du Virumbralesek Iñaki de Juanaren egoera: "BI iritzi artikulu idazteagatik soilik zigortu zuten, kalean behar zuenean. Gose greban 50 egun daramatza eta dagoeneko zazpi edo zortzi kilo galdu ditu. Gainera, indarrez elikatzen ari zaizkio Madrilgo ospitalean", azaldu du.
"Bakea presoengatik"
Askatasuneko kideak hitz gogorrak izan ditu Josu Luis Rodriguez Zapateroren gobernu zein alderdiaren aurka: "Txantaia egiteko eta ezker abertzaleari neurri guztietan presioa egiteko erabiltzen dituzte gauza guzti hauek Espainiako Gobernuak eta PSOEk. Bakea presoengatik izaerako prozesua nahi dute, euskal herritarrek beti adierazi dutenean gatazka politikoa badagoela eta horri irtenbidea ematea dela gakoa". Horren harira, "errepresio bideak desaktibatzea" exijitu die Virumbralesek.
Bederatzi hilabete luze igaro dira ETAk su-etena iragarri zuenetik eta horrek "ez du ezertxo ere ekarri" kartzela barrura. Are gehiago, euskal preso politikoen bizi baldintzak "okertu" egin dira, Asier Virumbralesek salatu duenez. Uribe Kosta eskualdean abenduaren 30etik urtarrilaren 6ra bitartean izango den ekimen ibiltaria aurkezteko prentsaurrekoan egin ditu adierazpenak Askatasuneko kideak. Espetxetik kanpo ere "areagotu egin dira erasoak", errepresioaren aurkako erakundearen ustez: "egunero ez bada astero ditugu ezker abertzalearen aurkako zitazioak Espainiako Auzitegi Nazionaletik, ilegalizazio estrategia ere indarrean dirau, baita mobilizazio eskubidearen ukapena ere", nabarmendu du Virumbralesek. Hain zuzen ere PSOE eta Jose Luis Rodriguez Zapatero Espainiako presidentea egin ditu egoeraren "erantzule" Askatasuneko kideak; baita gauzak aldatzeko garai badela gogoratu ere: "lanak pilatzen ari zaizkie. Bada unea mugitzen hasteko, bai kartzela barruan, bai kanpoan". Argazkian, Mitxel Sarasketa preso ohia eta Asier Virumbrales Askatasuneko kidea (ezkerretik eskuinera) Algortako gaurko agerraldian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun