Dozena bat zinegotzik eta 50 bat udal langile eta herritarrek parte hartu dute eguerdian Barajasko atentatua gaitzesteko Getxoko udaletxe aurrean egindako elkarretaratzean, Carlos Alonso Palateren gorpua agertu ostean Eusko Jaurlaritzak eta Eudelek Araba, Bizkaia eta Gipuzkoan egindako deialdiari erantzunez. Besteak beste, Iñaki Zarraoa alkatea, Guzman Aranaga kultur zinegotzia, Manu Etxebarria Ogasun zinegotzia eta Gorka Uribe jelkideak, Marisa Arrue, Eduardo Andrade eta Jesus Toca Toña popularrak, Iñaki Urkiza Etxebizitza eta Gizarte Gaietarako Ezker Batuko zinegotzia, Eusko Alkartasuneko Fernando Burzako Ingurumenerako zinegotzia eta Luis Almansa PSE-EEko bozeramailea izan dira Neguriko kontzentrazio isilean. Udaletxea irekita egon da eta hainbat hiritarrek igaro dira atean kontzentratuta egon diren zinegotzien ondotik udal gestioak egiteko. Era berean, Orain dela bi urte ez bezala, arazorik gabe burutu da gaurko elkarretaratzea. Dena den, udaletxetik 50 bat metrora udaltzain talde bat zegoen prest arazorik egonez gero parte hartzeko. Bestalde, ETAko su-etena iraun duen bitartean bezala, gaur PPko zinegotziek udal bulegoetatik udaletxerako aldapa bizkartzainen artean igo dute. Iñaki Zarraoa alkateak kontzentrazioa eta gero “deitoratu eta gaitzetsi” du atentatua eta horren “arduradun bakarra ETA” izan dela azpimarratu du: “ez da aitzakiarik bilatu behar eta, gainera, ez da horretarako eguna”.
Zarraoaren arabera, abenduaren 30a “egun tristea” izan zen eta gaur ere horrela izan da, Carlos Alonso Palate Barajasen desagertuta zegoen bi ekuadortarretako bat hilik agertu ostean. Alkateak nabarmendu du hilabeteak izan direla hildakorik gabe eta euskal gizarteak ez duela ETAkoa bezalako “babesik” behar: “ETA soberan dago” eta desagertu behar da. Horrela, Zarroak bere desioa agertu du ETAko kideak “has daitezela lan egiten herri honen alde, era baketsuan”. Izan ere, “erakunde militarrik ez du behar herri honek”. Bestalde, getxoztarrei esperantza izateko eskatu die, nahiz eta “naturala” den orain dela egun batzuk baino “ilusio gutxiago” eta ezintasun sentipena izatea. “Bakea herri honetara heltzeko guztiok egin behar dugu lan oraindik aurrera” azpimarratu du, eta maila pertsonalean aitortu du Barajasekoa “atzerapena baino ez izatea” desio duela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun