Jaurlaritzak Artatzako radarraren isunetako dirua "itzultzeko asmorik ez" duela dio Bizkaiko PPk
Javier Balza sailburuak Artatzako radarrak (Leioa) atzemandako arau hausketetatik eratorritako isunak (lehendabizikoa izan ezik) barkatuko zituela Eusko Legebiltzarrean iragarri zuen arren, "Eusko Jaurlaritzako Herrizaingo Sailak ez du itzuli eta ez du itzultzeko asmorik gidariek dagoeneko ordaindutako multen dirua", Antonio Basagoiti Bizkaiko PPko presidenteak salatutakoaren arabera. "Aipatu saileko informazioan" oinarritu da ordezkari popularra salaketa egiteko. Basagoitiren hitzetan, "ez dagokion kopurua poltsikoratzen ari da Herrizaingo Sailak. Hori dela eta, diru hori ahalik eta lasterren itzuli behar duela uste dugu. Bestela, PPk irmoki beti salatu duena agerian geratuko litzatele, Trafiko Zuzendaritzak dirua irabazteko asmoa baino ez duela hain zuzen". Ildo horretan, "kudeaketa ezin okerragoa" egotzi eta dimititzeko eskatu dio Andoni Arriola Trafiko zuzendariari. Argazkian, Artatza inguruko errepidea.
Antonio Basagoiti Bizkaiko PPko presidenteak gogoratutakoaren arabera, "isunak barkatzearena guk egindako salaketagatik etorri zen. Dagoeneko hori egiten ari zen Trafiko zuzendariak hainbat pertsonekin eta, jakitera eman zenean, Herrizaingo Sailari ez zitzaion gidari guztiei isunak barkatzea beste aukerarik geratu eta horregatik iragarri zuten lehenengoa baino ez zutela kobratuko". Herrizaingo Saila gidariekin kontaktuan jarri den ala ez egiaztatzeko, informazioa eskatu dio Balzari Carlos Urquijo PPko legebiltzarkideak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun