Urtarrilaren 2tik egoitza berria du DYAk, Sopelako Akilino Arriola kalean. Momentuz, 9:00etatik 20:00etara egingo dute arreta, baina etorkizunean 24 ordutako zerbitzua ematea aurreikusten dute. Hedapen berri honekin, Uribe Kostako herri guztietara heltzeko aukera izango du DYAk, Sopelako udal iturriek nabarmendutakoaren arabera. Eskualdean lau anbulantzia (Sopelan bat eta gainontzeko hirurak Getxo udalerrian), salbamenduko lur orotako ibilgailu bat, kanpaina-ospitale bat eta lau osasun-bizikleta dago orain. Imanol Garai alkatearen hitzetan, “zerbitzu honek orain arte pentsaezina zirudien arintasuna suposatuko du auzokoak hartatzeko orduan, zalantzarik gabe oso berri ona dena”. Argazkian, Imanol Garai alkatea DYAko anbulantzia ikusten.
DYAko erizainek “Sopelako udaltzainen laguntza izango dute uneoro", udal agintariak iragarri duenez. Udaltzaingoak horiekin hitzegin du jada talde biak koordinatzen saiatzeko”. Era berean, “Sopela bezalako herri batean, hainbeste handitu dena azken urteotan, ekimen hau oso garrantzitsua” iruditzen zaiola azpimarratu du Garaik. “Udalak proiektu honi lagunduko dio eta etekina ez dute bakarrik sopeloztarrek nabarituko, baizik eta Uribe Kostako biztanle guztiek", gaineratu du. DYAri borondatez lagundu nahi dion edozein pertsona erakundearen bulegoetara hurbil daiteke. Erakundeak osasun-heziketa eskaintzen die bere proiektuan parte hartu nahi duten lagunei. "Errentaren aitorpenean kendu ahal diren diru-laguntzak ere ongi etorriak izango dira", diote udal iturriek. Bestalde, zerbitzuan ez dauden bitartean, DYAko erizainek presio arteriala neurtuko diete egoitzera hurbiltzen direnei. Bulego berria, momentuz, Akilino Arriola kalean kokatuta dago.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun