Getxoko hilerria handiagotzeko lanak 866.789 eurotan agindu berri dituzte eta sei hilabete eta erdiko iraupena izango dute, Iñaki Zarraoa alkateak aditzera eman duenez. Lanak datorren irailean amaitzea aurreikusten dute eta 1.620 nitxo eta 604 hezurtoki berri egingo dira. Hemendik gutxira hasiko diren lanen bitartez gaur egun dagoen lurzorua "era arrazionalagoan" aprobetxatuko da. Hilerriaren barruko 320 metro koadroko gune batean indusketa lanak egingo dituzte, eta bertan sei bloke ipiniko dituzte, baita horietara heltzeko arrapalak ere. Argazkian, Iñaki Zarraoa alkatea.
Zarraoak aipatu du lanek bi helburu izango dituztela: “alde batetik, herritarren eskaerei erantzuteko nitxo eta hezurtoki gehiago edukitzea eta bestetik, une honetan gutxiegi erabilita dagoen hilerriaren orubea berreskuratzea ahalbideratuko duen egitura egokitzea. Antzinako hilobiak zeuden orube horietan eta berrantolatu ondoren, herritar ugarik eskatutako hilobi berriak eraiki ahal izango dira”. Udal agintariek ez dute aurreikusten panteoi berriak eraikitzea “lurra neurriz kanpo erabiltzea litzatekela iruditzen zaigulako”. Getxoko Hiri Antolaketarako Plangintza Orokorrean "HAPO" lurra gordetzea jasotzen da, behar izatekotan, etorkizunean udal hilerria zabaltzen segitzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun