Bihar, asteazkena, urtarrilak 10, Loiuko aireportutik irtengo da Nikaraguarantz Euskal Herriko Unibertsitateko lehen ikasle taldea, Ertamerikako herrialde hartako alfabetatze kanpainan praktika akademikoak egiteko, EHUko iturriek jakinarazi dutenez. Kanpaina horren helburua analfabetismoarekin bukatzea da (2005ean nikaraguarren %36,9 analfabetoa zen), Unescok analfabetismorik gabeko lurralde izenda dezan aurten. Alfabetatze kanpainan, "Yo si puedo" izeneko ikus-entzunezko metodo kubatarra erabiltzen da, heldu batek hiru hilabetean irakurtzen eta idazten ikastea ahalbidetzen duena. Lehenengo ikasle talde hau Managuara helduko da Daniel Ortega presidente berriak kargua hartuko duen egunean, hain zuzen. Ortega Nazio Askapenerako Fronte Sandinistako (FSLN) burua da eta partidu hori alfabetatze kanpainaren bultzatzaile nagusietako bat izan da. Lehenengoari beste hiru ikasle taldek jarraituko diote apirilean, uztailean eta urrian. Guztira, EHUko 42 unibertsitariok parte hartuko dute ekimenean. Argazkian, "Yo si puedo" kanpainaren garapena Kuban.
EHUko lehen talde hau Filosofia eta Hezkuntza Zientzien Fakultateko Pedagogia titulazioko eta Bilboko eta Gasteizko Irakasleen Eskoletako hamar ikaslek osatzen dute. Hiru hilabeteko egonaldian kanpainaren ardura duten udal teknikariekin lan egingo dute. Praktika hauek Garapenerako Lankidetza Proiektuetarako Praktika Programaren barruan daude. Aipatu egitasmoa 2003an onartu zuen EHUko Gobernu Kontseiluak eta lankidetza erakundeen proiektuetan, garapen bidean dauden herrietan, derrigorrezko praktikak egitea ahalbidetzen du, esperientzia prestakuntza akademiko-praktikoan barneratuz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun