Iñaki de Juana eta gainontzeko "guda bahituen" askatasuna exijitzeko mobilizazioak izango dira bihar eta etzi Uribe Kostan

Amnistiaren Aldeko Mugimenduak deituta, "xantaia politikoaren kontra", gose greban 65 egun bete dituen Iñaki de Juana eta "guda bahitu guztiak berehala aska ditzaten" exijitzeko mobilizazioak egingo dira egunotan Euskal Herrian. Besteak beste, bihar, osteguna, elkarretaratzea izango da Leioako Boulebardean, PSE-EEren egoitzaren aurrean. Etzi, ostirala, Algortako Telletxe plazan egingo da kontzentrazioa. Biak ala biak 20:00etan izango dira. Bestalde, joan den larunbatean Donostiako Anoeta belodromoan egitekoa zen eta Espainiako Auzitegi Nazionalak debekatu zuen ekitaldirako, Iñaki de Juanak idatzitako gutunaren edukiak jakitera eman dituzte hainbat hedabidek. Presoak zehaztu duenez, "gatazkaren arrazoien soluzioak soilik ekarriko ditu hainbat belaunaldik borrokatutako justizia eta askatasuna". Azkenik, amnistia eta autodeterminazioaren alde, otsailean zehar baraualdia egingo duela iragarri du Euskal Preso Politikoen Kolektiboak (EPPK). Argazkian, 2006ko azken ostiralean Algortan egin zen elkarretaratzearen irudi bat.