Leioako Udalak ere abiatuko du Ibarretxe eta Eudelek adostutako gizartearen parte-hartzea bultzatzeko ekimena
Juan Jose Ibarretxe Eusko Jaurlaritzako lehendakariak eta Euskal Udalen Elkarteak (Eudel) akordioa sinatu dute gaur, "gizartearen parte-hartzea bultzatzeko, bakea eta normalizazio politikoa eraikitzeko". Barajasko atentatuaren ondoren, "ETAk herriaren ilusioak apurtu ditu berriro", Ibarretxeren eta Eudelen ustez. "Aurreko su-etena bukatu zenean amildegira joan ginen. Orain berriro joan behar al dugu?", galdetu du Ibarretxek. "Amildegira ez joateko, bide bakarra dago: sare sozial indartsua eratu behar dugu eta gizartearen parte-hartzea bideratu, beste aukera bat lantzeko eta lortzeko", erantzun du. Argazkian, Karmelo Sainz de la Maza Eudeleko presidente eta Leioako alkatea.
Lehendakariak eta Karmelo Sainz de la Maza Eudeleko presidente eta alkate leioaztarrak sinatu dute hitzarmena, Gasteizen, eta Leioan ez ezik, herri eta hiri hauetako udaletan ere abiatuko dute ekimena: Durangon, Gautegiz-Arteagan, Gernika-Lumon, Mungian, Azkoitian, Donostian, Bergaran, Tolosan, Amurrion eta Laudion. Donostiakoa (PSE-EE) eta Amurriokoa (EA) ez beste udalak, EAJren esku daude. Eusko Jaurlaritzak finantzatutako teknikari batzuek plangintza eta metodologia bat egingo dute, eta udalek euren ikusiko dute nola garatu. Gero beste udalek bat egin ahal izango dute ekimenarekin; "ekimenak ez du lurralde aldetik mugarik". Gorka Espiau Elkarriko zuzendaritzako kide ohia ari da ekimena koordinatzen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun