“Zutabe” ETAren aldizkariak banatuz erakunde hori lagundu egin zutela egotzita, Erika Bilbao AuBko kide erandioztarraren eta Bizkaiko beste zortzi gazteren aurka gaur Espainiako Auzitegi Nazionalean ospatzekoa zen epaiketa atzeratu egin dute. Penaleko Bigarren Aretoko epaileak erabaki hori hartu du akusazioaren aldeko lekukotasuna eman behar zuten hainbat polizi epaiketara joaterik ez dutelako izan, tartean egun Afganistanen dabilen bat, eitb24.com-ek jakinarazi duenez. Jesus Alonso fiskalak sei urteko espetxe zigorra eta 1.800 euroko kalte ordaina eskatu du gazte bakoitzarentzat.
Guardia Zibilaren txostenetan oinarritutako akusazioaren arabera, Ibon Goitia, Iker Legarra, Mikeldi Zenigaonaindia eta Mitxel Zenarruzabeitiari leporatzen die 2005eko martxoaren 23an Lekeitiotik Anoetara bidaiatzea, bertan hainbat “Zutabe”, paperezkoak zein digitalak, hartu eta, Bizkaian bueltan, Leioan Erika Bilbaori emateko. Bertsio horren arabera, Lekeitiorantz berriro zihoazela kontrol batean harrapatu zituzten Ermuan 60 bat aldizkari eta 10 CDekin. Sumario berean auziperatuta daude Xabier Erkiaga, Jon Akarregi, Gaizka Likona eta Urtzi Etxeberria. Erika Bilbao bere kabuz aurkeztu zen 2005eko maiatzaren 18an Espainiako Auzitegi Nazionalean, Madrilen, eta aske utzi zuten, 6.000 euroko fidantzapean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun