Neguriko ertzain etxeko agenteek 21 eta 30 urteko bi gizonezko atxilotu zituzten atzo arratsaldean, lesio delituak eta legez kanpoko atxikipena egotzita. Eusko Jaurlaritzako Herrizaingo Sailak jakinarazitakoaren arabera, ustezko delitugileek gizon bati eraso eta zauriak egin zizkioten: zenbait labankada eman zizkioten, horietako bat lepoan (bederatzi sutura puntu eman behar izan zizkioten). Erasoa atxilotuetako batek Getxo udalerrian (ez dute gehiagorik zehaztu) duen tabernan jazo zen, eta biktimak, bere borondatearen kontra, bertan gelditzera behartu zuten. Ertzaintzak gertaeraren berri izan zuenean, ustezko bi egileak atxilotu zituen. Horietako batek, A.E.M. 30 urteko Bilboko bizilagunak, delitu aurrekariak ditu, eta arma zuriz lesioak egitea egotzi diote. Horren anaia, 21 urteko B.E.M. erasoan parte hartzeagatik atxilotu zuten. Gaur goizean geratu dira biak agintaritza judizialaren esku.
Salaketan jasotzen denez, gertakaria abenduaren 10eko goizaldean jazo zen Getxo udalerriko taberna batean; oraindik ez dakitela erasoa zerk eragin zuen. Jabeetako batek hainbat labankada eman zizkion gizon bati, eta babesten saiatu zenean, eskuetan ere ebakiak eta sastadak jasan zituen. Jarraian, erasotzaile horren anaia agertu zen, eta zenbait ukabilkada eman zizkion aurpegian, hainbat zauri eginez. Erasoa bukatutzat jo zutenean, bertan gelditzera behartu zuten biktima hainbat orduz, bere borondatearen kontra, nahiz eta odol asko galtzen ari zen. Azkenean, biktima ospitalera eramaten utzi zioten hirugarren pertsona bati. Lepoan jasandako zauria ixteko bederatzi puntu behar izan zituen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun