Espainiako Auzitegi Gorenak berretsi egin du Orkatz Gallastegiren (argazkian) aurkako zigorra, Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez. Jose Maria Lidon epailearen gaineko informazioa Urtzi Muruetari ematea leporatuta, 26 urteko espetxealdia ezarri zioten, 2005eko abenduan, Berangoko euskal preso politikoari. "Orkatz hasieratik zegoen kondenatuta. Horretarako atxilotu zuten. Lidon ustez hil zutenak hilak ziren, eta errudun zuzenen bat behar zuten, bide batez, Lidonen familiarrek kasu hauetan errudunei aplikatzen zaien 'erantzukizun zibila' jasotzeko. Eta Orkatz kandidato ona zen Ertzaintzarentzat, Eusko Jaurlariarentzat. Eta hor dago, espetxean, Ertzaintzak, Eusko Jaurlaritzak, Espainiako auzitegiek, Espainiako Gobernuak, dirua legezko itxurak eginez kobratu beharrak, El Correok eta bestek kondenatuta", salatu du errepresioaren aurkako erakundeak.
Horretaz gain, errepresioaren "erantzule" egin ditu Javier Balza Herrizaingo sailburua eta Juan Jose Ibarretxe EAEko lehendakaria AAMk: "kasu honetan ere agerian gelditzen da Balza eta Ibarretxek errepresioan eta zapalketan daukaten erantzukizun zuzena. Izan ere, nahikoa litzateke horietako batek Orkatz torturatu egin zutela aitortzea muntaia guztia bertan behera lagatzeko. Baina, horixe da, eurek egindako muntaia".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun