Imanol Garai alkatea atzo elkartu zen Eusko Jaurlaritzako Ur Saileko arduradunekin sarrera berria proiektatu den azaleraren ezaugarriak lekuan bertan ezagutu ahal izateko. Ur Sailak, Ingurumena eta Lurralde Antolamendua Sailaren barruan dagoena, proiektu berriak zonalde horretako erreketan eta itsasotik hurbilago dagoen eremuan izango duen eragina aztertu zuen. Bisita amaitu ondoren, Ur Saileko arduradunak Udalak aurkeztutako azterketarekin bat etorri ziren, tokiko arduradunen arabera.
Bareñoko etxebizitzak
Garaik bere poza agertu zuen proiektu berriaren aurrean. “Sopelako auzokoek Uribe Kostako korridorearekin lotura berria izango dute. Sopela ondo komunikatua egoteagatik eta gure herrian sartzea erraza izateagatik egiten ari garen esfortsurako aurrerapausu garrantzitsua suposatzen du ekimen honek”, azaldu zuen alkateak. Egitasmo berriarekin Uribe Kostako korridorea ez da bakarrik herrigunearekin Larrabasterrako zonaldetik lotuta egongo; errepide berria egongo da herrian sartzeko. Horretaz gain, “Bareñoko eraikin berriek ere sarbide egokia izango dute eta hondartzak haien artean lotuta geratuko dira, sopeloztarren eta bisitarien eskaerei erantzuna emanez”, amaitu zuen udal agintariak. 2007ko urte amaieran babestutako etxe ugari eraikitzea aurrikusten dute, 200 inguru, babes ofizialekoak batzuk eta tasatutako salneurrikoak beste asko, Bareño, Asu eta Loiolan.
Uribe Kostako korridorea eta Sopelako hondartzak lotzeko errepidea egingo dute
Uribe Kostako korridorea eta Arriatera eta Atxabiribil hondartzak lotuko dituen errepide berria egiten hasiko dira 2007an zehar. Sopelako Udalak martxan jarriko duen proiektu honek Loroño kalean eraikiko den errotonda eta Udaletxeko plaza elkartuko dituen zubia ere aurrikusten du. Errotonda berria gaur egun Sopela Bilbao-Plentzia errepidearekin, Loroño kalearen bidez, elkartzen dituen bidegurutzea dagoen tokian eraikiko da eta hemendik Udaletxeko plazaraino zubi bat jarriko dute, zonalde horretan dagoen malda gainditzeko, ohiko zubiak baino altuagoa izango dena. "Sarbide berriak Sopelatik igarotzen den trafikoa arinduko du eta herriko hondartzetara sartzea erraztuko du", aipatu dute udal iturriek. Errotondak Bareñon eraikiko diren etxebizitzak herrigunearekin eta hondartzekin ere lotuko ditu. Argazkian, Larrabasterratik Berangorainoko bidea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun