Zazpi aktorek, zuzenean lan egingo duten bi musikarik eta ikus-entzunezko muntaia batzuek 1936. urtera eramango gaituzte. "Gerra Zibila hasi zenean, Parisen, Errepublikaren gobernuko ordezkari ziren intelektualak salatzen ibili ziren mundua genozidio horren aurrean pasibo zegoela. 1937ko uztailean hiri horretan Erakusketa Unibertsala egingo zenez eta horren prestaketekin zebiltzanez, gobernuko ordezkariek Picassori eskatu zioten Espainiako Pabilioian, toki pribilegiatu eta oso handian, jarriko zen lana egiteko", azaldu dute kultur iturriek.
Gaineratu dutenez, "berri txarrak etengabe agertzen dira, eta pintorearen sortzeko amorru biziak azkenean leher egin zuen matxinatuen alde zegoen Condor Legioak Gernika suntsitu zuenean. Beraz, Picassoren lanak eta inspirazioak artea eta salaketa batzen dituzte lan bikain batean. Harrezkero, lana AEBetara joan zenetik, batetik bestera ibili da gai hori salatuz eta, beraz, munduari garrasi egiten dion oihala dela esan dezakegu".
"Gernika" margolanaren inguruko antzezlana taularatuko du larunbatean Algortan Maskarada taldeak
Amerikako Estatu Batuetako (AEB) eta Madrilgo agertokietatik igaro eta gero, Maskaradak bere azken lana dakar Algortara: "Picasso, 1937: historia del Gernika" hain zuzen. Obra horrek historian oraindik gertukoa den aldia berraztertzen du, Picasso omentzearekin batera. Halaber, Maskaradak ez ditu ahaztu nahi Gerra Zibilean erbesteratzea edo errepresioa jasan zuten intelektualak, ezta garaiko dramatismoa ere. Hori guztia "Gernika"ren sorreraren hastapenen bidez kontatzen dute. Maskaradak larunbat honetan, urtarrilak 20, antzeztuko du “Picasso 1937, Gernikaren Historia”, Algortako Getxo Antzokian, 20:00etan. Picasso jaio zela 125. urte bete direla (2006an) eta Gernika bonbardatu zela 70. urte igaro direla (2007an) gogoratzen du antzezlanak. Sarrerek 9 euroko prezioa izango dute (7 euro erretiratuentzat edo Gazte Txartela dutenentzat). Argazkian, antzezlanaren irudi bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun