Orkatz Gallastegi eta Aimar Hidalgo epaituko dituzte otsailaren 28an Madrilen
2007ko urt. 15a, 20:52
Otsailaren 28an Orkatz Gallastegi (Berango), Aimar Hidalgo (Algorta) eta Gaizka Gañan (Santurtzi) gazteen kontrako epaiketa egingo da Espainiako Auzitegi Nazionalean, Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez. Fiskalak 18na urteko espetxe zigorra eskatzen die, Algortan 2000ko abuztuaren 2an autobus bat erretzea leporatuta. "Akusazioaren froga bakarrak Ertzaintzak aurkeztu zituen 2004an: autobusa erre ondoren inguruan aurkitu omen zituzten hiru pertsona hauen ADN aztarnak nonbait. Berriro ere salatu nahi dugu Ertzaintzaren prozedura hau. Nondik-nora sinistu behar diogu polizia honi, lau urte pasa ondoren aurkeztutako ADN froga horien inguruan? Non daude berme juridikoak? Ertzaintzak nahi duena espetxera bidali dezake politikoki Jaurlaritzari interesatzen zaiolako?", salatu du errepresioaren aurkako erakundeak. Argazkian, orain gutxi, Orkatz Gallastegi berangoztarraren aurkako 26 urteko zigorra berretsi zuen Espainiako Auzitegi Gorenak.Uribe Kostako AAMren hitzetan, "jakina, Espainiako Auzitegi Nazionalak errepresio politikorako baliogarritasuna ematen dio Ertzaintzaren prozedurari, inolako berme juridikorik gabe egin arren. Baina hori ez da harritzekoa, nahikoa dugu besteren artean egun hauetan Orkatzen aurka berretsi duten beste sententziarekin zertan ari diren ikusteko. Baina honetan guztietan argigarriena hauxe da: Ertzaintzak errepresio politikoan jokatzen duen papera eta, azken batean, Jaurlaritzak jokatzen duen papera. Errepresio politikorik ez! Baldintza demokratikoak orain!".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun