Ostiralean izango da Galeako olatu handiaren txapelketa

Hainbat saiakeren ostean, eguraldia lagun, ostiral honetan (urtarrilak 19) egingo da azkenean Oxbow Punta Galea Big Challenge txapelketa, 12:30etik aurrera. Horrela jakinarazi du bere webgunean Euskal Herriko Surf Federazioak. Gutxienez lau metroko olatuen gainean ibili beharko dute aurretik hautatuko diren 16 surflariek. Lehiaketa honen formatoa ere berezia da; txapelketa 3 edo 4 ordu besterik ez du irauten, bertan surflari bakoitzak erabakitzen du noiz sartu. Epaileek hainbat maila bereiztuko dituzte eta horren arabera hurrengoak sarituko dituzte: olatu handiena, surflari osotuena, jaitsiera deigarriena eta wipe out ederrena. 6.800 euro banatuko dira guztira, iazkoaren bikoitza. Denek jasoko dute gutxienez 200 euro. Argazkian, txapelketaren iazko edizioko irudia / EHSF.