Matematiken Olinpiadako lehen fasea izango da bihar Leioako campusean

Erabiltzailearen aurpegia Ukberri 2007ko urt. 18a, 21:26
Matematiken 43. Olinpiadako lehenengo fasea (eskualde mailakoa) egingo da ostiral honetan, urtarrilak 19, EHUko Leioa eta Erandioko campuseko Zientzia eta Teknologia Fakultateko areto nagusian, goizeko 9:30etik aurrera. Batxilergoko 60 bat ikaslek parte hartuko dute bertan, unibertsitateko iturriek gaur iragarri dutenez. Matematiken Olinpiada Espainiako Matematika Elkarteak antolatzen du, eta lehen fase honetan, 2006-2007 ikasturtean Batxilergoan matrikulaturik dauden Euskal Autonomia Erkidegoko (EAE) ikasle guztiek parte har dezakete. Fase honetan lehiakideek hiru problema ebatzi beharko dituzte goizean (9:30etik aurrera) eta beste hiru arratsaldean (15:00etatik aurrera). Saio bakoitzean hiru ordu izango dituzte hiru problemak ebazteko. Frogak euskaraz edo gaztelaniaz egin daitezke, eta idazteko eta marrazteko tresnak baino ezin dira erabili, hau da, kalkulagailuak, liburuak, taulak eta bestelako dokumentuak debekatuta daude. Argazkian, iaz Espainia mailan zilarrezko domina irabazi zuen Leioako Gaztelueta ikastetxeko Diego Gonzalez Pintok.
Lehenengoak 380 euro jasoko ditu; bigarrenak, 285 euro; hirugarrenak, 220 euro. Gainera, hirurak bigarren fasera (Espainia mailakora) igaroko dira; bigarren fasea Torrelodonesen (Madril) izango da, martxoaren 22tik 25ra bitartean. Bigarren fase horretan lehenengo sei sailkatuei urrezko domina eta 750na euro emango dizkiete, eta gainera, nazioarteko talde olinpikora pasatuko dira, Nazioarteko 48. Matematika Olinpiadan lehiatzeko, uztaileko lehen hamabostaldian, Hanoin (Vietnam). Aurreko Matematika Olinpiadako Espainia mailako fasean, Leioako Gaztelueta ikastetxeko Diego Gonzalez Pintok zilarrezko domina lortu zuen eta Donostiako Usandizaga BHIko Javier Goñi Molak brontzezko. EHUk hirugarren urtez Olinpiada prestatzeko tailer bat antolatu du, eta 40 bat ikaslek parte hartu dute.
Hezkuntza Leioa
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun