Telema moja frantsesen komunitate batek bultzatutako herrixka da. Herri horretan, Kongoko Kinshasa lurraldean dauden adimen urritasuna duten pertsonak hartu eta babesten dituzte. Bertan, sineskeriek eta baliabide ekonomiko ezak bultzatuta, familiek eta leinuek etxetik bidaltzen ohi dituzte gutxitu psikikoak, kalean utziz. Batzuetan ere, urritasunak dituztenak erasotzen dituzte. Teleman, berriz, etxea eman eta elikatzeaz gain, adimen urritasuna dutenak birgizarteratzea saiatzen dira, errehabilitazio fisikoa, tailerrak, lan prestakuntza, sukaldaritza ezagupenak eta abarren bidez.
Itzubaltzeta / Erromoko elizak urteak daramatza Telemako zentroa laguntzen eta urtero 6.000 bat euro inbertitzen du bertan, Gabonetan, Aste Santuan eta beste egunetan bildutako diruari esker. Lehenengo aldia da Agate Deuna ere horretarako erabiliko dutena.
Agate Deunarako Ziztu Bizianen egutegia:
- Urtarrilak 20, larunbata, 18:00etan, entsegua.
- Urtarrilak 21, igandea, 18:00etan, entsegua.
- Urtarrilak 27, larunbata, 18:00etan, entsegu nagusia.
- Otsailak 4, igandea, 11etatik 2etara, Agate Deunaren kanta kalejira Itzubaltzeta / Erromon zehar.
Ziztu Bizian Itzubaltzeta / Erromoko eskaut taldeak adimen urritasuna duten pertsonentzat Kongon dabilen Telema proiektua diruz laguntzeko kantari aterako da kalera datorren otsailaren 4an, Agate Deunan. Hau izango da lehenengo aldia Ziztu Bizian Agate Deunako ospakizuna baliatuz kalera irtengo dena, ohiko diru eskea egiteko asmoz. Roberto skaut taldeko kideak aitortu duenez, hasieran begiraleak baino ez zirela aterako uste zuten baina, bai neska-mutilek, bai gurasoek eta bai auzokide batzuek parte hartzeko interes handia adierazi dute eta dagoeneko 30 bat lagun baieztatu dute aterako direla, izan ere, “Kongoko Kinshasa aldean dagoen Telema herrixkako proiektua tradizio handia dauka gure herrian”. Agate Deunako makil erritmoa eta kantak ikasteko entsegu irekiak bihar hasiko dira, arratsaldeko 6etan, Itzubaltzeta / Erromoko San Jose elizako areto nagusian. Ziztu Bizianek azpimarratu duen bezala, ez dago adin mugarik ezta ahalegin handiegirik egin behar. Argazkian, Agate Deunako ohiko irudi bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun