Aiboa Casares 2002ko martxoaren 8ko ordu txikietan atxilotu zuten, Segiren kontrako operazioaren barruan. Casares Areetan zegoen, bere mutil lagunaren etxean, atxilotua izan zenean. Gau hartan hamabi lagun atxilotu zituen Espainiako Poliziak, Baltasar Garzon epailearen aginduz. Garzonek atxilotuei "Jarrai-Haika-Segi" erakundeko "arduradun nagusiak" izatea eta kale borroka koordinatzea leporatu zien, "ETA-Ekin" azpiegituraren barruan kokatuz. 2005eko apirilaren 27an, berriz, Casaresekin batera preso zeuden Haika eta Segiko ia kide guztiak libre utzi zituzten eguerdian Espainiako Auzitegi Nazionaleko 4. Aretoko epaileek.
Ia hiru urte gehiago
2005eko ekainean, aldiz, bi urte eta erdi eta hiru urte eta erdi arteko espetxe zigorrak ezarri zizkien Espainiako Auzitegi Nazionalak "Haika-Segi auzian" epaitutako 28 gazteetarik 24ri. Zehazki, gazte horiek "legez kontrako elkarteko buruzagi edo kide" direla zion epaiak, baina, era berean, Jarrai, Haika eta Segi ez direla "erakunde terroristak" ebatzi zuen, "ETAren helburuekin bat egin arren" ez dutelako inoiz armarik erabili. Epaituei ezarri zizkieten zigorrak Fiskaltzak eskatutakoak baino nabarmen txikiagoak ziren. Gainera, epaituetako lau absolbitu egin zituen tribunalak. Aiboa Casares astrabuduarrari, hiru urte eta erdiko espetxe zigorra jarri zioten, espetxean hilabete bat eta hainbat aste eginda zituenean. Santentzia berriaren arabera, beste bi urte, hamar hilabete eta pare bat aste egin beharko ditu kartzelan Casaresek.
Astelehenean, Jarrai, Haika eta Segiren aurkako ebazpena kaleratzeko data otsailaren 8ra arte atzeratzea erabaki zuen arren, gaur eman du jakitera bere erabakia Espainiako Auzitegi Gorenak: gazte erakundeak "legez kanpoko taldeak" direla esaten zuen Espainiako Auzitegi Nazionalaren epaia bertan behera utzi eta "talde terrorista" direla ebatzi du. Horretaz gain, Auzitegi Nazionalak ezarritako zigorrak handitu ditu Gorenak. Egoitz Lopez de la Calle Uribarri aske utzi duen arren, gainontzeko 23 auziperatuei, bi eta hiru urte eta erditik, sei urtetara handitu die espetxealdia, erakunde terroristako kide izatea egotzita; Aiboa Casares astrabuduarra tartean dela. Horrenbestez, dagoeneko gazteak atxilotzeko agindua eman du Auzitegi Nazionalak. Sententzia horrek 18/98, Amnistiaren Aldeko Batzordeak eta Askatasuna edo Egunkaria kasuetan eragina izango duela ere adierazi dute. Segik gizarteari deitu dio mobilizazioei adi egoteko. Argazkian, espetxetik irtenda, Casaresi maiatzaren 7an egin zioten ongi etorriaren irudia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun