Espainiako Auzitegi Nazionalak atxilotzeko agindua eman eta ordu gutxitara inguratu da polizia Aiboa Casaresen etxera, Astrabuduako Amnistiaren Aldeko Mugimenduak UKBERRI.NETi jakinarazi dionez. Guardia Zibileko agenteak izan dira lehendabizi agertu direnak, arratsaldeko 5ak aldera, baina ez dute gazte astrabuduarra etxean harrapatu. Handik ordu laurdenera ertzainak hurbildu dira bertara eta, orduan ere ez zegoen etxean Casares. Informazio gehiagorik ez duela baieztatu du errepresioaren aurkako erakundeak. Bitartean, auziperatutako hiru lagun atxilotu dituzte Guardia Zibilak eta Ertzaintzak. Espainiako Auzitegi Nazionalak eguerdian eman du Aiboa Casares astrabuduarra eta beste 22 gazte atxilotzeko agindua, Auzitegi Gorenak Jarrai, Haika eta Segi "talde terroristak" direla ebatzi ostean. Dagoeneko ebazpena salatzeko lehenengo mobilizazioak deitu dituzte. Besteak beste, Itzubaltzeta / Erromoko Kolas plazan jarri dute hitzordua bihar 20:00etan. Argazkian, joan den ostiralean, Itzubaltzetan izandako manifestazioa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun