Europar Batasunak sustatzen duen garapenerako lankidetza aztertuko dute bihar Leioako campusean

“Gaur egungo gai nagusiak” hitzaldi zikloen hirugarren edizioaren barruan, bihar, asteazkena, goizeko 12etan, Francesc Granell (argazkian) irakasleak “La cooperacion al desarrollo de la Union Europea” hitzaldia emango du Leioa eta Erandioko campuseko Gizarte eta Komunikazio Zientzien Fakultateko gradu aretoan. Granell Europar Batasuneko (EB) Batzordean hainbat ardura bete ostean egun ohorezko zuzendari nagusia da eta EBko Itun Konstituzionalari buruzko erreferendumean baiezkoa eskatu zuen. Gainera, Ciutadans per Europa taldeko presidentea izateaz gain, Bartzelonako Unibertsitateko Ekonomia Fakultateko Nazioarteko Antolakuntza Ekonomikoko katedraduna ere bada. Hitzaldia EHUko Nazioarteko Ikasketen Katedrak antolatu du eta ikasturteko hirugarrena da, dagoeneko Latinoamerikako gailur politikoak eta Kyotoko protokoloa jorratu dituztela eta gaur egungo nazioarteko gai zerrendaren kontu garrantzitsu gehiago mintzagai izango direla, tartean Txinaren nazioarteko harremanak edo Europako energia politikak. Hitzaldirako sarrera mundu guztiari irekita egongo da.