Amnistiaren Aldeko Mugimenduak astelehenean plazaratutako oharra:
Amnistiaren Aldeko Mugimenduak, Espainiar auzitegi nazionalaren eskutik sumario ezberdinetan inputatuak diren lagunekin batera eskaini du gaur prentsaurrekoa Usurbilen.
Jarrai, Haika eta Segi gazte erakundearen kontra auzitegi nazionaleko gorenak ebatzi berri duen epaia gogor salatu da bertan, zeinak gazte erakundea terrorista izendatzen duen eta 23 gazteren atxilotze eta kartzelatze agindua eman duen.
Honako epaiak, legezko bilakatzen baitu proiektu politiko baten kriminalizazioa, militanteen kontrako pertsekuzio eta zigorra, baita eskubide zibil eta politikoen urraketa ere.
Honako epaiak, ateak ixten dizkio parez–pare, bide politikoari eta beraz, elkarrizketari.
Herri honen kontrako erasoa ulertzen dugu. Oso oker baitaude, ezker abertzalearen arazo gisa ulertzen duten horiek. Euskal Herriaren bizitza politiko eta soziala baldintzatu, etorkizunari ateak itxi eta funtsean, hitza eta erabakia erdiesteko herri hau murgildua den ibilbidean eskua sartu eta berau zuzentzeko erasoa baita honakoa.
Herri gisa erantzun behar zaio eraso honi. Herri gisa babestu baita ere, herri honetako gazteria. Izan ere, bere gazteria babesten ez duen herriak ez baitu etorkizunik, ez bada sumisioan eta menpekotasunean.
Euskal Herriak marko demokratiko berria behar du. Marko berri horrek oinarri demokratikoak behar ditu eta Euskal Herriaren hitza eta erabakia ahalbidetu behar du, egoera berri bat sortuz non proiektu politiko guztiak, Euskal Herriko lurralde guztietan defendatu eta gauzatu ahal izango diren.
Euskaldunok, Euskal Herrian egin behar dugu bide hori, trabarik gabe, esku sartzerik gabe eta bide hori zuzendu nahiz zapuzteko bide errepresiborik gabe. Euskaldunok eta soilik euskaldunok, ez beste inork.
Herri gisa erantzuteko deia luzatu nahi dugu. Datorren urtarrilaren 25ean, mobilizazio eguna izango da Euskal Herriko herri guztietan. Goizez eta arratsaldez manifestazio eta elkarretaratzeak izango dira egun honetan.
Amnistiaren Aldeko Mugimendua
Jarrai, Haika eta Segi erakundeen ilegalizazioaren aurkako hamaika mobilizazio izango dira gaur eskualdean
“Gazteria independentista aurrera! Hitza eta erabakia askatasunez” lelopean, Amnistiaren Aldeko Mugimenduak, LAB sindikatuak eta legez kanporatze politikagatik sumario ezberdinetan auzipetuak diren hainbat lagunek deituta mobilizazio eguna dago deituta gaurko Euskal Herri osoan. Uribe Kostan, Espainiako Auzitegi Gorenak Jarrai, Haika eta Segi “terroristatzat” jo izanaren aurkako mobilizazioak ohiko leku eta orduetan izango dira. Bitartean, oraindik espetxeratu ez dituzten Aiboa Casares eta beste 18 auziperatu atxilotze nazioarteko agindupean jarraitzen dute, eta Xabi Paya edo Iker eta Kepa Azero surflariak bezalako hainbat herritar ezagunek “Ireki aukerak independentziari. Euskal gazteria aurrera” manifestua abiatu dute. Dagoeneko, Uribe Kostako taldeen lehenengo sinadurak heldu dira: Itzubaltzetako Bertso Eskola, Leioako Kurkudi kultur elkartea, Itzubaltzeta / Erromoko Branka elkartea, Ukabilkada musika taldea eta Berangoko, Erandioko eta Itzubaltzeta / Erromoko Segi taldeak. Argazkian, atzo Leioako eta Erandioko campusean egindako protesten barruan, bertako Liburutegian egindako PSOE eta EAJren aurkako pintaketa / Gaztesarea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun