2006-2007 ikasturteko datuen arabera, Uribe Kostan 6.171 haur daude haur hezkuntza arrunteko 337 gelatan (ikusi taula pdf formatuan) eta haietariko 3.604 (%58,40) dago D ereduan, 1.353 (%21,93) B ereduan, 1.147 (%18,59) A ereduan eta 67 (%1,08) X ereduan. Hortaz, Uribe Kosta Bizkaiko parez-parekoa baino okerrago dago ikasleen hizkuntz eskubideak bermatze aldera. Lurraldean, 42.726 umek ikasten du haur hezkuntza, haietako 27.200ek (%63,66) D ereduan, 11.801ek (%27,62) B ereduan, 3.323k (%7,54) A ereduan eta 402k (%0,94) X ereduan.
Eusko Jaurlaritzako Hezkuntza Sailak euskararen ezagupena ebaluatzeko 2005ean erabili zuen B-2 azterketaren arabera D ereduan ikasitakoen %68, B eredukoen %33 eta A zein X eredutakoen %0 baino ez dira gai euskaraz era egokian moldatzeko. Emaitza global horiek Uribe Kosta zein Bizkaiko haur hezkuntzako haurrei egokituko bagenieke, Uribe Kostan umeen %46’95 eta Bizkaian %52,40 baino ez liratekeela ganoraz euskaldunduko izango genuke. Jakina, portzentaje horiek aldagai askorekin alderatu beharreko gutxi gorabeherako indizeak baino ez direla.
Alkarbide euskararako foru erakundeak jakinarazi duenez, gaur goizean abiatu da Bizkaiko gurasoei zuzendutako B eta D ereduen aldeko sentiberatze-kanpaina. Laster hasiko den 2 eta 3 urteko haurrak eskolaratzeko sasoiari aurrea hartuz kanpainari ekin diote Uribe Kosta, Bilbo, Txorierri eta Enkarterri eskualdeetan zein Hego Uribe, Ezkerraldea, Durangaldea, eta Mungialdeko hainbat udalerritan, guztira Bizkaiko 43 udal, iaz bezala. Heldu nahi den familia kopurua 15.500 da, iaz baino %25 gehiago. Kanpainaren leloari dagokionez, iazko “1+1=bi” mantentzea erabaki dute. Alkarbidek “euskarazko ereduetan matrikulatzeak dakartzan onurak” azaldu nahi dizkie gurasoei eta, batez ere, etorkinei. Kanpaina horretan udal arduradunek sinatutako gutunak eta hezkuntza ereduen gaineko informazioa, aholkuak eta gomendioak dituzten liburuxkak banatuko zaizkie gurasoei. Eskolan hastear dauden umeek “1+1=bi” leloko puzzlea opari jasoko dute. Bestalde, Euskadiko Eskola Kontseiluak hezkuntza eredu bakarra ezartzea proposatu du eta dozenaka eragilek iaz eskolak euskalduntzearen alde batutako 107.768 sinadurei erakundeek emandako erantzun ezaren aurrean ekitaldia egingo dute martxoaren 10ean. Argazkian, Leioako Altzaga ikastolako umeak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun