Espainiako Auzitegi Gorenak berretsi egin du orain urte bete Albaro Arri Pascual "Muni" euskal preso politiko algortarrari ezarri zioten 208 urteko espetxe kondena, Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez. Oraingoz 10 urteko espetxe zigorra betetzen ari da. Badauka 186 urteko beste zigor bat, Auzitegi Gorenak berretsia, eta Auzitegi Konstituzionalaren aurrean babes errekurtsoa aurkeztuta. Azken ebazpen hau ere Auzitegi Konstituzionalaren aurrean errekurritu egingo du bere abokatuak.
"Auzitegi Gorenaren azken sententzia honek berretsi egiten du 208 urteko kartzela zigorra, baina badu boto partikular bat, Perfecto Andres Ibañezena. Hau da, epaile honek berak ere ez du ontzat hartzen Muniren aurkako zigor hau, eta bere iritziz ez dago frogarik Muni zigortzeko. Izan ere, epaiketa egin zenean salatu genuen bezala, beste atxilotu batek komisarian torturapean sinatutako deklarazioan oinarritzen da Arriren aurkako sententzia guztia", salatu du errepresioaren aurkako erakundeak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun