Ezker Batuak ere boterearen truke beren “ezkerreko” ideiak ahaztea erabaki omen dau. Nola ulertu Getxoko Andra Maritik Azkorrira bitarteko lur eremutan 8400 etxebizitza berri eraikitzea? Nork ulertu Metrovacesa eta holako enpresa arrotzek herriko lurzoru batzuen jabe izatea? Eta nork sinisten dau halako proiektu suntsitzailea herriko gazteetan pentsatuz sortua dala? Edo gure Getxoko alkatearen esanetan, elkartasuna adierazteko keinu bat dala, jendeak Getxora bizitzen etorteko aukera izan dezan eta halako sustantzibako komentarioak.
Golf zelaia da lotuko dan berdegunerik haundiena, ta aipatutako gizonari zer esanik falta ez zaionez, aberatsak aberatsago ez egiteko mantendu da golf zelaia ikutu barik, ja! Ez dago aitzakiarik!
Indarrak batzen gabiltza, LZP delako hori berregituratu edo desagertu daiten. Etorkizuna herritarron partehartzeaz landu ta hobetu daigun. Gure bizimodua aldatu dezakeen proiektu txikitzailerik ez baitugu onartzen. Euskal Herriko hainbat herritan antzerako inposizioak gertatzen dabiltza. Momentua heldu jaku kalera urten eta gure jarrera adierazteko. Mila arrazoi dagoz domekan Getxoko probalekutik urtengo dan manifestazioan parte hartzeko. “Lur barik, arnasarik ez!” lelopean abiatuko dana eguerdiko 12etatik aurrera.
Geure euskeran esaten dan modun, “sasik eta garbiten ez badozuz, koxikotsuz ingeruk! (ez bagara hemengo kontu ilunak garbitzen hasten, beranduegi izengo da, inguru danak harrapatukoditu).
Andra Mari auzo elkartea
Getxon pairatzen ari garen egoera aspalditik hasitako espekulazioaren ondorioa da, amaierarik ez daukan hori. Herria saltzearen truke gitxi batzuen zorroak diruz betetzen dituena. Hau da, herritarron borondatea beste ideia batzuetan oinarritzen bada ere, gutxi horrek antolatutako gizartera moldatu beharrean gaude. Indio batek esan bezala, dena suntsituta dagoenean konturatuko omen dira dirua ezin jan daitekeela. Baina, tamalez ez da Amalurra soilik suntsitu, desegin eta txikitu behar dutena. Herria, nortasuna, nekazal kultura, euskararen berezko territorioa... gure pertsonalitatea guztiz desegin nahi dute. Gizartea alienatu, pertsonak automatetan bihurtu, hau da, herria kontrolpean euki, agintariek arazorik izan ez dezaten. Eta ez dira begiak guztiz zabalik euki behar arazoa agintariek berorrek direla hausnartzeko. PNVren politika espekulatzailea euren lagun diren konstruktora, inmobiliaria eta abar... murritz bat elikatzeko balio du soilik. Argazkian, auzokide batek 8.400 etxebizitzen planoei eta udal dokumentazioaren arabera desagerraziko lituzketen baserrien argazkiei so (baserrien kopurua 82, 105 edo 136 da, orrialdearen arabera).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun