Getxo Biziak zabaldutako oharra:
Andra Mari auzo elkartearen manifestazio deialdiarekin bat egiten dugu
Getxo Bizia Herri Plataformak igande eguerdirako Andra Mari Auzo Elkarteak deituriko manifestazioan parte hartzera deitzen ditu herritarrak.
Lurralde antolaketa eta hirigintza plan hauei ez!
Etxebizitza arazo larria da. Guztiontzako etxebizitzak egon badaude, baina jende asko eta askorentzat eta bereziki gazteentzat prezio eskuraezinak dituzte. Hutsik dauden etxebizitzak ere, milaka dira Getxon.
Bizkaiko Aldundiak eginiko Bilbo Metropoliaren Lurralde Zati Planak eta Getxoko hirigintza plangintzek, -indarrean dagoenak eta hau LZPra egokitzeko dokumentuak-, lurzoruaren okupazioa eta eraikuntza bultzatzen dute. Milaka etxe berri eraikitzearekin batera Babes Ofizialeko Etxebizitzen eskaintzak arazoa konponduko duela diote.
Baina eraikuntza batez ere negozioa da eta ondasun higiezina espekulazio gaia. Gehiago eta gehiago eraikiz negozioa eta espekulazioa biderkatuko dira, eta etxebizitzaren arazoa ez da konponduko. Etxebizitza guztiontzat eskuragarri izan dadin, administrazioek alokairu soziala bermatu behar dute eta hutsik dauden etxeek hutsik egoteari utzi behar diote.
Oraindik artifizialdu gabeko lurzoruak ditugun Getxoko eremu zabalean, Getxoren jatorria den nekazal eremuan alegia, 8.368 etxebizitza berri eraikitzea aurreikusten du Udalak prestaturiko txostenak. Etxebizitza beharren azterketarik egin gabe, mendetan zehar gorde egin den altxor natural eta kulturala zementupean estali nahi dute. Getxotik hasi eta Uribe Kosta osora hedatu nahi dute hondamendia.
Natur eta kultur ondarearen alde, etxebizitza eskubidearen alde eta espekulazioaren kontra, posible den mundu horrek behar duen Getxoren alde egin dezagun! Andra Mari auzo elkartearen deialdiarekin bat egin!
Domeka, urtarrilaren 28an, eguerdiko 12etan, manifestazioa:
Getxoko Probalekua – Maidagan - Benantzio – Sarrikobaso – Algortako Etorbidea – Mariandresena - Telletxe – Txiki eta Otaegi
Getxo Bizia
Getxo udalerriko ezker abertzalearen herri ekimenak herritar oro deitu du bihar Getxoko probalekutik goizeko 12etan abiatuko den 8.368 etxebizitzaren eraikuntza, LZP eta HAPOren aurkako manifestaziora joateko. Horrela, Andra Mari auzo elkarteak egindako deialdiarekin bat egin du ezkerreko plataforma abertzalea. Getxo Biziak onartzen du etxebizitzarena arazo “larria” dela, batez ere gazteentzat, etxeek dituzten “prezio eskuraezinak” direla eta. Alabaina, gogoan hartu du Getxon “milaka” etxebizitza daudela eta nahiz eta horrela izan Lurralde Zati Planak, Getxoko hirigintza planek eta HAPOren aldaketek egiten duten apustua etxebizitza gehiago eraikitzearen aldekoa dela. Getxo Biziaren ustez, hori “negozioa eta ondasun higiezina espekulazioa” biderkatzearen alde egitea da. Etxebizitzaren arazoari erantzuna emateko, ezker abertzaleko plataformak alokairu sozialaren eta “hutsik dauden etxeak” erabiltzearen aldeko politikak eskatu ditu. Bestalde, salatu dute “etxebizitza beharren azterketarik egin gabe”, nekazaritza guneak desagerrarazi eta getxoztarrek mendetan zehar gorde egin duten “altxor natural eta kulturala zementupean estali” nahi dutela, eta “hondamenditzat” jo dute aukera hori. Argazkian, Getxoko auzokideek kirol portuan egindako mobilizazio bat / Getxo especulacion.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun