Garapena beharrezkoa da eta denok gaude herria garatzearen alde, baina ezin dugu inposizioz sinatutako proiektu arrotzik ulertu. Proiektu honek kaltetuak ez dira euren baserria galduko dituztenak bakarrik; herritar guztiak, baikoitza bere neurrian, gara kaltetuak, eta ez Andra Mari auzoan gertatu daitekeenarekin, baizik eta herrian ematen diren beste inposizioekin ere: Galdaretxe, talaxoterapia zentroa, Erromoko parkinga... Joko politikoak, beste behin ere, jokaldi eskasak erakutsi dizkigu eta gaur egun udaletxean dauden talde politikoetatik batek ere ez du inolako informazio, harreman edo hartu emanik bilatu, momentuko interes alderdikoiengatik ez bada izan. Argi dago, inork ez gaituela udaletxe honetan ordezkatzen. Gure ahotsa entzunarazi behar dugu. Eta hemen dago gure oihua: lur barik, arnasarik ez! Lurra jaten dabilz, behin betirako lurra irensten, beharrezkoa den baliabidea murrizten, bizitza laburtzen, herriaren bizitza, nortasunaren bizitza, Amalurraren heriotza.
Etxebizitzaren egoera larria da. Denok ulertzen dugu gaur egun etxea lortzeko dauden zailtasunak. Baina espekulazio iraunkor eta basatiaz aparte, alternatibarik badago zailtasun horiek bideratu, berrantolatu eta arintzeko. Hazkunde proportzionatua lortzeko. Beraz, proiektua berrikusi, berrantolatu eta berriz zerotik hastea aldarrikatzen dugu. Aipatutako baldintza partehartzaile batzuetan oinarrituta. Ez gara isilduko! Gaurko eguna oso garrantzitsua da. Erakustaldi bat izan da herria bizirik eta arduratuta dagoenaren seinale. Herriari errespetu bat zor zaio. Horregatik gaude hemen! Hemendik aurrera ere lanean jarrai behar da eta guztiei luzatzen dizuegu gonbitea elkarrekin herriaren alde lan egiteko. Arnasten jarraitu behar dugu.
Lur barik, arnasarik ez. LZP gelditu!
Andra Mari auzo elkartea
Arrazoi desberdinak bultzatu gaituzte gaurko ekimena egitera. Batetik, gure ardurak kaleratzeko helburuarekin. Arduratzekoa baita Getxoko Andra Mari auzoa desegin behar duen proiektua, arduratzekoa den moduan LZP (Lurralde Zati Plana) delakoak gure eskualdean eta Euskal Herrian orohar, eragin behar dituen suntsiketa arduragabeak. 8.500 etxebizitza berri eraiki behar dituzte Andra Maritik Azkorrirako lur eremuetan, Aldundiaren hazkunde demografikoaren azterlanean aurrikusten ez dituztenak. Neurri basati batean eraiki nahi dute, herriaren beharrizanen gainetik, herriaren partehartzerik gabe, modu ilun eta izkutu batean. Andra Mari auzo elkartearen aburuz, proiektua gardentasunez erakutsi eta eztabaidagai bihurtu behar da. Herriaren parte hartzea bultzatuz, Amalurra zainduz; nortasun, kultura eta historia errespetatuz. Argazkian, Lander Labajo Andra Mari auzo elkarteko bozeramailea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun