Andra Mari auzo elkarteak behin eta berriro azaldu du bere kezka 8.368 etxebizitza eraikitzeko Getxo aldeko 82 etxe eta baserri botako dituztenaren beldur. Atzo, hori ukatzeko, Javier Dean Eusko Jaurlaritzako Etxebizitza sailburuordeak eta Iñaki Urkiza arlo horretako zinegotziak proiekturen aurrerapenak "horrenbesteko xehetasunik ez" duela ematen aipatzeak ez dio "inolako lasaitasunik" ematen Arrueri, beste hainbat "akats" ikusten dituelako: "proiektua lardaskeria izan da hasieratik, orain egingo dutela esan arren, ingurumenaren gaineko eraginari buruzko azterlanik ez dagoelako; horretaz gain, ez dator bat Lurzoruaren Legearekin eta; hori gutxi balitz, txosten ekonomikoa pezetatan eginda dago", azaldu du tokiko popularren buruak.
Hirigunea
Auzotarrek deitutako manifestazioan adierazi bezala, aldaketarik egin aurretik, 2001an onartutako Hirigintza-Antolamendurako Plan Orokorrean (HAPO) zehaztutako hiriguneetan eraikitzea eskatu du Alderdi Popularrak. Arruek emandako datuen arabera, babes ofizialeko 700 etxebizitza egin daitezkeela zehazten du horrek, "baina Lurzoruaren Legera moldatuz gero 1.200 izango lirateke". Hori litzateke, popularren ustez, "etxebizitza politika serioa" egitea, "ez azken zortzi urtetan bezala babes ofizialeko 48 etxebizitza besterik ez banatzea".
Getxoko PPk prentsa ohar bidez iragarri duenez, Getxorako aurrikusitako hirigintza proiektua gelditzea eskatuko du otsailaren 23ko udalbatzarrean. Marisa Arrue (argazkian) popularren bozeramailearen iritziz, "aldaketa horren garrantzitsua egiteko beharrezkoa da ahalik eta adostasun mailarik handiena bilatzea, udal gobernuak egin ez duena hain zuzen". Arrue "kezkatsu" azaldu da EAJ, EA eta EB-Berdeen jokabidearekin, "oposizioko alderdiekin negoziaziorik egon ez delako eta, are gutxiago, kaltetutako auzokideekin". "Euren kontura osatzen doaz proiektua, adostasunik bilatu gabe. 2006ko udaberrian onartu eta Bizkaiko Aldizkari Ofizialean argitaratutakoaren arabera egun dauden etxeen %75 botako dituzte. Nahiz eta hori ez dela gertatuko adierazi, ez dute horren gaineko konpromisorik hartu auzotarrekin", salatu du Getxoko PPko zinegotziak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun