Ertzaintzak JM.B.V. 19 urteko Bilboko mutila atxilotu du gaur Erandion, lapurreta delitu baten egilea delakoan. Eusko Jaurlaritzako Herrizaingo Sailak zabaldutako bertsioaren arabera, polizia agenteek ezustean harrapatu dute gaztea aurretik indarra erabilita sartu den taberna batetik ateratzen. Goizaldeko laurak aldera, partikular batek ertzainei deitu eta Ollaga kaleko taberna batera joateko eskatu die, berak lokaleko alarma entzun eta bertara hurbiltzean txanodun hiru pertsona tokitik korrika ateratzen ikusi baititu. Behin, bertan, lapurrak barrura sartzeko lehio bat indarrez ireki dutela ikusi dute ertzainek. Era berean, agenteek mazo bat eta kutxa erregistratzaile baten hondakinak aurkitu dituzte espaloian.
Ordubete beranduago, eta lokalaren miaketa bukatu ostean, patruila auto bat frogen bila abiatu da Oleaga kaletik eta, 100 metrora, Elexaurre kale kantoian, beste taberna bateko alarma joka ari zela ohartu dira. Barruan zaratak entzuten ziren eta agenteak azkar hurbildu dira sarrerako atea apurtuta zegoela egiaztatuz. Lokal barrutik pertsona bat atera da, makurtuta, eskularru batzuk eta txanodun kirol jertsea zeramatzala, polizia iturrien arabera. Ertzainak ikusi bezain laster ustezko lapurra ihes egiten saiatu da eta eurei laguntzeko zetorren beste patruila batek harrapatu du. JM.B.V., 19 urteko Bilboko bizilagunak gauean zehar beste lapurreta batean parte hartu duela aitortu omen du. Atxilotua Ollaga kaleko tabernako lapurretan parte hartu duen ala ez ikertzen jarraitzen du Ertzaintzak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun