Hitzez hitz, Itsasoruntz Sareak kaleratutako idatzia:
Herritarren harresia altxa dezagun. Herritarren olatua harro dezagun
Itsasoari mugak ipintzerik ez dagoen bezala, geroz eta beharrezkoagoa den gatazkaren konponbiderako prozesuari ezin zaio bidean harri koskorrik jarri. Hori dela eta, "Elkarrizketa. Errespetua Euskal Herriari. Bakea" lelopean, larunbat honetan Milakabilaka herri ekimenak larunbat honetarako, otsailak 3, Bilbon deitutako manifestazioan parte hartzera deitzen ditu Uribe Kosta eskualdeko lagunak eta, oro har, euskal herritar guztiak Itsasoruntz Sareak. Areatzako zubitik abiatuko da martxa, 17:00etan.
Prosezua hilda dagoela esanez, baten batzuk jendartearen esperantza zapuztu eta gatazkaren konponbidea oztopatzeko eraiki nahi duten "lotsaren harresia" bota dezagun behingoz, herritarren olatua harrotuz. Bada garaia, aurrez aurre jarri nahi diguten horma hori eraitsi eta, prozesua sostengatzeaz gain, itzuliezina egingo duen herritarrek zimendatutako babes hezia altxatzeko. Hori baita bide bakarra etorkizunari heltzeko, gurpilean makilak jartzen dituzten horiena ere baden etorkizuna.
Bidea luzea izango zela bagenekien, baita une latzak egongo zirela ere. Baina haurtxo guztiek aita-amen babesa behar duten bezala, izan gaitezen herritarrok prozesuaren bermatzaile. Eskubidea ez ezik, betebeharra ere badugu. Ibiliz ibili egin dezagun bidea, oztopoak alde batera utzita. Bada, prozesuaren aldeko milaka pausuz bete dezagun bihar Bilboko asfaltoa. Dagoeneko eta oraindik gehiagotan egin beharko dugun arren, aldarrika dezagun Euskal Herriari, herritar guztien eskubideei eta herritarren erabakiari errespetua.
Herritarren harresia altxa dezagun! Herritarren olatua harro dezagun!
Itsasoruntz Sarea
e-posta: itsasoruntz@hotmail.com
Milakabilakak biharko Bilbon deitutako manifestazioarekin bat egin du Itsasoruntz Sareak
Itsasoruntz Sareak Uribe Kostako lagun zein euskal herritar oro deitu du larunbat honetan, otsailak 3, "Elkarrizketa. Errespetua Euskal Herriari. Bakea" lelopean, Bilboko Areatzako zubitik 17:00etan abiatuko den manifestazioan parte hartzeko. Horrela, Milakabilakak egindako deialdiarekin bat egin du gatazkaren konponbiderako prozesuaren aldeko herri ekimenak. Itsasoruntz Sareko kideek aladarrikatu dutenez, "prosezua hilda dagoela esanez, baten batzuk jendartearen esperantza zapuztu eta gatazkaren konponbidea oztopatzeko eraiki nahi duten 'lotsaren harresia' bota dezagun behingoz, herritarren olatua harrotuz. Bada garaia, aurrez aurre jarri nahi diguten horma hori eraitsi eta, prozesua sostengatzeaz gain, itzuliezina egingo duen herritarrek zimendatutako babes hezia altxatzeko". Argazkian, urriaren 21ean 275 bat surflari sartu ziren Algortako Portu Zaharreko uretan presoen eskubideak eta etxeratzea aldarrikatzeko / Etengabe.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun