Era berean, manifestu bat ere aurkeztu zuten joan den larunbatean eta nahi duen guztiak dauka atxikitzeko aukera, maila pertsonalean zein talde moduan. Horretaz gain, Itzubaltzeta/Erromon hainbat tokitan dago atxikitu ahal izateko izen-emate kartela, Itzubaltzeta gaztetxean eta Branka herriko tabernan, hurrenez hurren. Dagoeneko Uribe Kosta eskualdean ugariak eta anitzak dira aipatu manifestuarekin bat agertu diren norbanako zein kolektibo eta erakundeak. Horien artean daude UKBERRI.NET, Koska irratia, Maritxu Teilagorri Txosna Batzordea (Leioa), Maritxu Teilagorri Txosna Batzordea, Getxo Herri Kirol Taldea (Algorta), EHUko Erandio eta Leioako campuseko IA, Udondo gaztetxea (Leioa), Dmentes Konszientes musika taldea (Leioa), Algortako Gazte Asanblada (Algorta), Txorimalo gaztetxea (Getxo), Itzubaltzetako Bertso Eskola (Itzubaltzeta / Erromo)... Azkenik, Ibon Meñika eta Olatz Dañobeitia Jarrai-Haika-Segi auziko zigortuei elkarrizketa argitaratu du gaur "Gara" egunkariak. Aurkitu eta atxilotzeko agindupean dira baina "orain arte borrokatu duten gauza beragatik borrokan" jarraituko dutela adierazi dute.
Espainiako Auzitegi Gorenak urtarrilaren 19an jo zituen "talde terroristatzat" Jarrai, Haika eta Segi gazte erakundeak; baita auzipetutako neska-mutiletatik 23ri (bat absolbitu egin zuten) sei urteko espetxe zigorra ezarri ere. Bitartean, oraindik espetxeratu ez dituzten Aiboa Casares eta beste 18 auziperatu atxilotze nazioarteko agindupean jarraitzen dute. Horren harira, urtarrilaren 28an, Segiren aurkako sententzia salatu eta mobilizazioak iragarri zituzten gazte mugimenduko hainbat eragilek. Besteak beste, igande honetan (otsailak 4) elkarretaratzea egongo da Bilboko Areatzan, 12:00etan, "Ireki aukerak independentziari! Euskal gazteria aurrera!" lelopean. Hilaren 10ean, berriz, nazio manifestazioa izango da Donostiako Boulebardetik abiatuta, 17:30ean. Horietan parte hartzera deitu du Itzubaltzeta / Erromoko Segik. Bitartean, Bilboko kontzentrazioa debekatu du orain gutxi Baltasar Garzok epaileak. Argazkian, sententziaren aurka Itzubaltzetan egindako manifestazio bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun